Avropanın ən nüfuzlu qadınlarından biri Bakıda – Ursula fon der Leyen kimdir?
Dünən, 22:04. Yazar: vasif
Avropa Komissiyasının prezidenti Ursula fon der Leyen iyulun 1-də Azərbaycana səfər edəcək. Onun Bakıya budəfəki gəlişi Avropa İttifaqı ilə Azərbaycan arasında enerji, iqtisadiyyat və regional əməkdaşlıq baxımından mühüm əhəmiyyət daşıyır.
Ursula fon der Leyen 1958-ci ildə Belçikanın Brüssel şəhərində anadan olub. Həkim təhsili alan Leyen sonradan siyasətə qoşularaq Almaniyada müxtəlif yüksək dövlət vəzifələrində çalışıb. O, Angela Merkel hökumətində ailə, əmək və müdafiə naziri postlarını tutub, 2019-cu ildə isə Avropa Komissiyasının tarixində bu vəzifəyə seçilən ilk qadın olub.
Qərb mediasında tez-tez "ikinci Merkel" kimi təqdim edilən Leyen son illər Avropa siyasətinin ən təsirli simalarından biri hesab olunur. **Forbes** jurnalı onu ardıcıl olaraq dünyanın ən güclü qadınları sırasında göstərib.
Siyasətlə yanaşı şəxsi həyatı da diqqət çəkir. Tibb professoru Heiko fon der Leyenlə ailə quran siyasətçi yeddi uşaq anasıdır. O, həm siyasi karyerası, həm də böyük ailəsi ilə Avropa ictimaiyyətində fərqli nümunə kimi tanınır.
Leyen fəaliyyəti dövründə bir sıra mübahisəli qərarlarla da gündəmə gəlib. COVID-19 pandemiyası zamanı vaksin müqavilələri, "Yaşıl Saziş" siyasəti və Yaxın Şərq məsələlərinə münasibəti Avropada geniş müzakirələrə səbəb olub.
Bununla yanaşı, o, Ukraynaya dəstək verən Avropa liderləri arasında ən fəal siyasətçilərdən biri kimi tanınır və Rusiyaya qarşı sanksiyaların genişləndirilməsini dəstəkləyən əsas fiqurlardandır.
Azərbaycanla münasibətlərdə isə Leyenin adı xüsusilə enerji əməkdaşlığı ilə bağlı xatırlanır. O, 2022-ci ildə Bakıda Azərbaycan Prezidenti İlham Əliyevlə enerji sahəsində strateji tərəfdaşlığa dair memorandumun imzalanmasında iştirak etmişdi.
Ekspertlərin fikrincə, bu dəfəki səfər də enerji təhlükəsizliyi, regional əməkdaşlıq və Avropa İttifaqı–Azərbaycan münasibətlərinin gələcək inkişafı baxımından xüsusi əhəmiyyət daşıyır.
Geri dön