Analitiklərdən Kremlin gələcəyi ilə bağlı yeni proqnoz
Bu gün, 18:11. Yazar: vasif
Ukraynadakı son hərbi əməliyyatlar fonunda beynəlxalq analitiklər Rusiyanın qarşıdakı aylarda münaqişə ilə bağlı yeni qərarlar vermək məcburiyyətində qala biləcəyini bildirirlər.
“The Sun” nəşrinin ekspertlərə istinadən yaydığı məlumata görə, Ukraynanın xüsusilə enerji və logistika infrastrukturuna yönəlmiş hücumları Rusiyanın hərbi imkanlarına əlavə təzyiq yaradır.
ABŞ ordusunun Avropadakı keçmiş komandanı, istefada olan general-leytenant Ben Hodces hesab edir ki, son dövrdə döyüş meydanında təşəbbüsün böyük hissəsi Ukraynanın tərəfindədir. Onun sözlərinə görə, uzaqmənzilli raketlər və pilotsuz uçuş aparatlarından geniş istifadə müharibənin dinamikasına ciddi təsir göstərib.
Digər ekspert Kir Caylz isə bildirib ki, mövcud tendensiyalar davam edərsə, Moskva üçün münaqişəni əvvəlki intensivlikdə davam etdirmək daha çətin ola bilər. O hesab edir ki, müəyyən mərhələdə döyüşlərin dondurulması variantı Kreml tərəfindən daha ciddi şəkildə nəzərdən keçirilə bilər.
Bununla belə, analitiklər vurğulayırlar ki, bu qiymətləndirmələr mövcud vəziyyət əsasında irəli sürülən proqnozlardır və Rusiya rəhbərliyi tərəfindən müharibənin dayandırılması və ya dondurulması ilə bağlı hər hansı rəsmi qərar açıqlanmayıb.
Geri dön