Makron: İsrail qoşunlarını Livandan çıxarmağa başlamalıdır
Bu gün, 12:00. Yazar: vasif
Fransa Prezidenti Emmanuel Makron bildirib ki, bölgədə davamlı sabitliyin təmin olunması üçün İsrail qüvvələri Livan ərazisindən çıxmağa başlamalıdır.
Makron bu barədə Livan Prezidenti Joseph Aoun, Baş nazir Nawaf Salam və Nümayəndələr Palatasının sədri Nabih Berri ilə keçirdiyi müzakirələrdən sonra sosial şəbəkədə paylaşım edib.
Fransa lideri vurğulayıb ki, Paris Livanın suverenliyini və ərazi bütövlüyünü qəti şəkildə dəstəkləyir. Onun sözlərinə görə, tərəflər arasında möhkəm atəşkəs rejimi formalaşdığı təqdirdə paralel olaraq iki proses başlamalıdır: İsrail qoşunlarının Livan ərazisindən çıxarılması və Livan Silahlı Qüvvələrinin ölkənin cənub bölgələrində yenidən yerləşdirilməsi.
Makron qeyd edib ki, Livan dövlətinin ölkə ərazisində güc tətbiq etmək üzrə müstəsna hüququ bərpa olunmalı və təhlükəsizlik tam şəkildə dövlət qurumlarının nəzarətinə keçməlidir.
Fransa Prezidenti əlavə edib ki, ölkəsi bu prosesə praktik dəstək göstərməyə hazırdır. Paris yaxın həftələrdə Livan hökuməti ilə birlikdə beynəlxalq ictimaiyyəti səfərbər etməyi, Livan ordusunun imkanlarının gücləndirilməsi və məcburi köçkünlərin ehtiyaclarının qarşılanması üçün əlavə yardım mexanizmlərinin yaradılmasını planlaşdırır.
Makronun bəyanatı ABŞ, İran və regional tərəflər arasında əldə olunan son razılaşmalar fonunda Livanda uzunmüddətli sabitliyin təmin olunmasına yönəlmiş beynəlxalq səylərin davam etdiyini göstərir.
Geri dön