Azər Kərimli: “Azərbaycan–Türkmənistan əməkdaşlığı Böyük Mərkəzi Asiya məkanının formalaşmasına mühüm strateji töhfələr verəcək”
Bu gün, 10:06. Yazar: azer
“Müasir beynəlxalq münasibətlər sistemində regional əməkdaşlıq təkcə coğrafi yaxınlıq amili ilə müəyyən olunmur. Dövlətlərin ortaq siyasi iradəsi, qarşılıqlı etimadı və uzunmüddətli strateji baxışı yeni geoiqtisadi məkanların formalaşmasında əsas rol oynayır. Prezident İlham Əliyevin Türkmənistan Prezidenti Sərdar Berdiməhəmmədov ilə keçirilən görüşdən sonra mətbuata verdiyi bəyanat da məhz bu reallığı əks etdirir. Səfər zamanı səsləndirilən fikirlər göstərir ki, Azərbaycan və Türkmənistan münasibətləri artıq yalnız ikitərəfli əməkdaşlıq çərçivəsində deyil, bütövlükdə Avrasiya məkanında yeni inteqrasiya proseslərinin mühüm tərkib hissəsinə çevrilir. Prezident İlham Əliyevin Azərbaycanın Mərkəzi Asiya Dövlət Başçılarının Məşvərət Şurasına tamhüquqlu üzv qəbul edilməsində Türkmənistanın göstərdiyi dəstəyi "tarixi hadisə" kimi qiymətləndirməsi xüsusi diqqət çəkir. Bu yanaşma təsadüfi deyil. Azərbaycan coğrafi baxımdan Cənubi Qafqazda yerləşsə də, tarix, mədəniyyət, dil və ortaq siyasi maraqlar baxımından Mərkəzi Asiya ölkələri ilə sıx bağlıdır. Son illərdə bu əlaqələrin institusional müstəviyə keçməsi regionlararası əməkdaşlığın yeni mərhələsinin əsasını qoyur. Dövlət başçısının vurğuladığı kimi, böyük Mərkəzi Asiyanın vahid geosiyasi və geoiqtisadi məkan kimi qəbul olunması artıq nəzəri yanaşma deyil, praktik reallığa çevrilməkdədir. Bu prosesdə Azərbaycan Xəzər dənizinin qərb sahilində yerləşən etibarlı tərəfdaş, Türkmənistan isə şərq sahilində mühüm tranzit və enerji dövləti kimi çıxış edir. Hər iki ölkənin koordinasiyalı fəaliyyəti Şərqlə Qərbi birləşdirən yeni iqtisadi xəttin daha da güclənməsinə xidmət edir.”
Bu ifadələr Milli Məclisin deputatı Azər Kərimlinin aia.az-a açıqlamasında yer alıb.
Fikirlərini davam etdirən millət vəkili Prezident İlham Əliyevin nəqliyyat-logistika sahəsinə dair təqdim etdiyi açıqlamaların müasir beynəlxalq münasibətlərin mahiyyətini dəqiq ifadə etdiyini xüsusi vurğulayıb: “Dünyada geosiyasi risklərin artdığı bir dövrdə etibarlı, təhlükəsiz və dayanıqlı nəqliyyat marşrutlarının əhəmiyyəti xeyli yüksəlib. Azərbaycan və Türkmənistanın uzun illər ərzində formalaşdırdığı əməkdaşlıq bu baxımdan yalnız iki dövlət üçün deyil, daha geniş coğrafiya üçün strateji əhəmiyyət daşıyır. Bu marşrutlar beynəlxalq ticarətin sabitliyinə, yükdaşımaların təhlükəsizliyinə və iqtisadi əlaqələrin davamlı inkişafına töhfə verir. Dövlət başçısının “siyasi qarşılıqlı fəaliyyət olmasaydı, heç bir coğrafi şərait səylərimizi birləşdirməyə imkan verməzdi” fikri xüsusi siyasi məna daşıyır. Bu yanaşma göstərir ki, infrastruktur layihələrinin uğuru ilk növbədə dövlətlər arasında formalaşmış etimada və qarşılıqlı dəstəyə söykənir. Azərbaycanın son illərdə həyata keçirdiyi balanslaşdırılmış və praqmatik xarici siyasət məhz belə etimad mühitinin yaranmasına imkan verib. Türkmənistanla münasibətlər də bu siyasətin uğurlu nəticələrindən biridir. Türkmənistan Prezidentinin ölkəmizə səfəri zamanı enerji sahəsində əməkdaşlığın genişləndirilməsi istiqamətində ifadə olunan niyyət də mühüm perspektivlər açır. Hər iki ölkə zəngin enerji ehtiyatlarına malik olmaqla yanaşı, onların beynəlxalq bazarlara təhlükəsiz və səmərəli çatdırılmasında maraqlıdır. Enerji və nəqliyyat sektorlarının qarşılıqlı şəkildə inkişaf etdirilməsi regionun geoiqtisadi çəkisini daha da artırır və yeni investisiya imkanları yaradır. Prezident İlham Əliyevin Türkmənistanın sosial-iqtisadi inkişafını yüksək qiymətləndirməsi, bu ölkənin neytrallıq siyasətinə Azərbaycanın dəyişməz dəstəyini ifadə etməsi isə iki dövlət arasında siyasi etimadın yüksək səviyyədə olduğunu göstərir. Qarşılıqlı hörmətə əsaslanan bu münasibətlər regional sabitliyin möhkəmlənməsinə, Türk dünyasında əməkdaşlığın genişlənməsinə və çoxtərəfli platformalarda ortaq mövqelərin formalaşmasına mühüm töhfə verir. Bütün bunlar göstərir ki, Azərbaycan–Türkmənistan münasibətləri yeni geosiyasi reallıqlar fonunda keyfiyyətcə fərqli mərhələyə qədəm qoyub. İkitərəfli əməkdaşlıq artıq regional inteqrasiyanın, beynəlxalq nəqliyyat-kommunikasiya layihələrinin və böyük Avrasiya məkanında iqtisadi əlaqələrin inkişafını şərtləndirən əsas amillərdən birinə çevrilir. Bu strateji tərəfdaşlıq modeli gələcək illərdə həm iki qardaş ölkənin milli maraqlarına, həm də regionda sülh, sabitlik və davamlı inkişafın möhkəmlənməsinə xidmət edəcək” – deyə, Azər Kərimli açıqlamasını başa çatdırıb.
Geri dön