İranın uran ehtiyatları ilə bağlı yeni detal: MAQATE nəzarət edəcək
Dünən, 21:00. Yazar: vasif
ABŞ və İran arasında imzalandığı bildirilən memorandumda İranın yüksək dərəcədə zənginləşdirilmiş uran ehtiyatları ilə bağlı mühüm müddəaların yer aldığı qeyd olunur. Məlumatlara görə, tərəflər uran ehtiyatlarının neytrallaşdırılması və prosesin beynəlxalq nəzarət altında həyata keçirilməsi məsələsində razılığa gəliblər.
Sənədə əsasən, İran zənginləşdirilmiş uran ehtiyatları ilə bağlı tədbirlərin Beynəlxalq Atom Enerjisi Agentliyinin nəzarəti altında həyata keçirilməsinə razılıq verib. Müzakirələr zamanı əsas variantlardan biri uranın yerində zərərsizləşdirilməsi və ya zənginləşdirmə səviyyəsinin aşağı salınması olub.
Razılaşmada həmçinin Hörmüz boğazında kommersiya gəmiçiliyinin bərpası, enerji daşımalarının təhlükəsizliyinin təmin edilməsi və İranın qlobal neft bazarına qayıdışını nəzərdə tutan müddəaların yer aldığı bildirilir.
Ekspertlər hesab edirlər ki, uran ehtiyatlarının taleyi ABŞ-İran münasibətlərində ən həssas məsələlərdən biri olaraq qalır. Vaşinqton uzun müddətdir bu ehtiyatların tam nəzarət altına alınmasını tələb edir, Tehran isə prosesin beynəlxalq nəzarət çərçivəsində həyata keçirilməsini müdafiə edir.
Hazırda tərəflər arasında yekun nüvə razılaşması üzrə danışıqların davam etdiyi və əldə olunan memorandumun gələcək daha geniş saziş üçün əsas rolunu oynayacağı bildirilir.
Geri dön