ABŞ-İran razılaşması bazarlara təsir etdi: İran rialı güclənir
Bu gün, 12:00. Yazar: vasif
İran və ABŞ arasında əldə olunan razılaşmanın ilk iqtisadi təsirləri artıq özünü göstərməyə başlayıb. Uzun müddətdir təzyiq altında olan İranın milli valyutası son günlərdə əhəmiyyətli dərəcədə möhkəmlənib.
Məlumatlara görə, diplomatik həll perspektivlərinin artması və regional gərginliyin azalması ilə bağlı gözləntilər İran maliyyə bazarlarında müsbət əhval-ruhiyyə yaradıb. Bunun nəticəsində rialın dəyərində nəzərəçarpacaq artım müşahidə olunub.
Azad valyuta bazarını izləyən mənbələrin məlumatına əsasən, ötən həftə ABŞ dollarının məzənnəsi təxminən 180 min tümən səviyyəsində olduğu halda, hazırda bu göstərici 152 min tümənə qədər geriləyib. Bu isə İran rialının bir həftə ərzində 15 faizdən çox möhkəmləndiyini göstərir.
İqtisadçılar hesab edirlər ki, bazar iştirakçıları ABŞ və İran arasında münasibətlərin normallaşması ehtimalını müsbət siqnal kimi qiymətləndirirlər. Xüsusilə sanksiyaların yumşaldılması və iqtisadi əlaqələrin genişlənməsi ilə bağlı gözləntilər milli valyutaya dəstək verir.
Qeyd edək ki, İran iqtisadiyyatı son aylarda yüksək inflyasiya, xarici sanksiyalar və regional gərginliklərin yaratdığı əlavə maliyyə yükü səbəbindən ciddi çətinliklərlə üzləşmişdi.
Müxtəlif geosiyasi hadisələrin fonunda dolların məzənnəsi bir müddət əvvəl rekord həddə yüksəlmiş, milli valyuta isə əhəmiyyətli dərəcədə dəyər itirmişdi. Bu vəziyyət ölkədə qiymət artımını sürətləndirmiş və əhalinin alıcılıq qabiliyyətinə mənfi təsir göstərmişdi.
Ekspertlərin fikrincə, əgər diplomatik proses davamlı xarakter alarsa və iqtisadi məhdudiyyətlərin bir hissəsi aradan qaldırılarsa, İran iqtisadiyyatında daha genişmiqyaslı sabitləşmə prosesləri başlaya bilər.
Bununla belə, analitiklər bazarlardakı müsbət reaksiyanın uzunmüddətli olub-olmayacağının tərəflər arasında əldə ediləcək yekun razılaşmalardan və regiondakı siyasi vəziyyətdən asılı olacağını vurğulayırlar.
Geri dön