Azərbaycan-Türkiyə birliyinin tarixi təntənəsi
Bu gün, 17:17. Yazar: azer
2021-ci il iyunun 15-də Azərbaycanın qədim mədəniyyət mərkəzi və Qarabağın tacı olan Şuşa şəhərində Azərbaycan Respublikası ilə Türkiyə Respublikası arasında müttəfiqlik münasibətlərini rəsmiləşdirən Şuşa Bəyannaməsi imzalandı. Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğanın iştirakı ilə imzalanan bu sənəd iki qardaş ölkə arasındakı münasibətlərin tarixində yeni mərhələnin başlanğıcı oldu.Şuşa Bəyannaməsi Azərbaycan və Türkiyə arasında mövcud olan dostluq, qardaşlıq və strateji tərəfdaşlıq əlaqələrinin ən yüksək səviyyəyə yüksəldiyini nümayiş etdirdi. Bu sənəd yalnız iki dövlət arasındakı münasibətləri deyil, eyni zamanda regionda sülhün, təhlükəsizliyin və əməkdaşlığın möhkəmləndirilməsi baxımından da mühüm əhəmiyyət daşıyır. Bəyannamə siyasi dialoqun, iqtisadi əlaqələrin, enerji və nəqliyyat layihələrinin, müdafiə və təhlükəsizlik sahəsində əməkdaşlığın daha da genişləndirilməsini nəzərdə tutur.Tarixi sənədin məhz Şuşada imzalanması xüsusi rəmzi məna daşıyır. Vətən müharibəsində qazanılmış möhtəşəm Zəfərdən sonra Azərbaycanın suverenliyinin və ərazi bütövlüyünün bərpa olunduğunu dünyaya nümayiş etdirən Şuşa şəhəri bu mühüm hadisəyə ev sahibliyi etməklə bir daha öz strateji və mənəvi əhəmiyyətini ortaya qoydu. Şuşa Bəyannaməsi həm də Azərbaycan xalqının əldə etdiyi qələbənin siyasi və diplomatik müstəvidə təsdiqi kimi qiymətləndirilir.Sənəddə tərəflərin beynəlxalq təşkilatlar çərçivəsində qarşılıqlı dəstəyinin davam etdirilməsi, regional layihələrin birgə həyata keçirilməsi, müdafiə sənayesi sahəsində əməkdaşlığın genişləndirilməsi və milli maraqların qorunması istiqamətində birgə fəaliyyət göstərilməsi öz əksini tapmışdır. Bu, Azərbaycan və Türkiyənin gələcəkdə də ortaq məqsədlər naminə çiyin-çiyinə fəaliyyət göstərəcəyini bir daha təsdiqləyir.Şuşa Bəyannaməsi türk dünyasının həmrəyliyinin və birliyinin gücləndirilməsi baxımından da mühüm rol oynayır. Ortak tarix, dil, mədəniyyət və milli-mənəvi dəyərlər üzərində qurulan münasibətlər bu sənəd vasitəsilə daha da möhkəmlənmiş, gələcək əməkdaşlıq üçün etibarlı hüquqi baza formalaşdırılmışdır. Bu gün Azərbaycan-Türkiyə münasibətləri regionun ən uğurlu əməkdaşlıq nümunələrindən biri hesab olunur və Şuşa Bəyannaməsi həmin münasibətlərin əsas sütunlarından biri kimi çıxış edir.İmzalanmasından ötən müddət ərzində Şuşa Bəyannaməsinin əhəmiyyəti daha aydın görünməkdədir. İki qardaş ölkə arasında siyasi dialoq, iqtisadi əlaqələr, hərbi əməkdaşlıq və humanitar münasibətlər sürətlə inkişaf edir. Bu isə sənədin yalnız siyasi bəyanat deyil, real nəticələr verən strateji yol xəritəsi olduğunu göstərir.
Şuşa Bəyannaməsi Azərbaycan-Türkiyə qardaşlığının sarsılmazlığını, xalqlarımızın ortaq gələcəyə olan inamını və regionun inkişafına verdiyi töhfələri özündə ehtiva edən tarixi sənəd kimi daim xatırlanacaqdır. Bu sənəd “Bir millət, iki dövlət” fəlsəfəsinin ən parlaq təcəssümü olmaqla yanaşı, gələcək nəsillər üçün də dostluq, birlik və həmrəylik nümunəsi olaraq qalacaqdır.
Qorxmazova Fidan,
YAP Qusar rayon təşkilatının fəalı
Geri dön