Yayın görünməyən təhlükəsi: Kondisionerdən düzgün istifadə etməsəniz...
Bu gün, 21:18. Yazar: vasif
Yay aylarında kondisioner evlərdə, iş yerlərində və avtomobillərdə ən çox istifadə olunan cihazlardan birinə çevrilir. Lakin həkimlər xəbərdarlıq edirlər ki, bu rahatlıq mənbəyi düzgün istifadə olunmadıqda sağlamlıq üçün ciddi risklər yarada bilər.
Mütəxəssislərin sözlərinə görə, kondisionerlərin daxili hissələrində rütubətli mühit formalaşdıqda müxtəlif bakteriyalar və mikroorqanizmlər çoxala bilər. Bu mikroblar hava vasitəsilə yayılaraq tənəffüs yolları xəstəliklərinə, bəzi hallarda isə ağır ağciyər infeksiyalarına səbəb ola bilir.
Həkimlər bildirirlər ki, soyuq havanın birbaşa insan bədəninə yönəlməsi boyun, çiyin, bel və əzələlərdə ağrılara gətirib çıxarır. Havanın temperaturundakı kəskin fərq isə immun sistemini zəiflədərək boğaz ağrısı, faringit və tonzillit kimi problemlərin yaranma riskini artırır.
Bundan əlavə, kondisioner işləyən mühitdə havanın quruması gözlərdə yanma və quruluq hissi, həmçinin dəri problemlərinə səbəb ola bilər. Xüsusilə uzun müddət qapalı məkanda qalan insanlar bu təsirləri daha çox hiss edirlər.
Mütəxəssislər otaq temperaturunun 22–24 dərəcə arasında saxlanılmasını tövsiyə edirlər. Çöldəki hava ilə otaq arasındakı temperatur fərqinin 7–8 dərəcədən artıq olmaması orqanizmin ani temperatur dəyişikliklərinə məruz qalmasının qarşısını alır.
Digər vacib məqam isə hava axınının istiqamətidir. Kondisionerin qanadları elə tənzimlənməlidir ki, soyuq hava birbaşa insanın üzərinə deyil, tavana və ya boş divara yönəlsin. Bu, əzələ tutulmaları və digər narahatlıqların qarşısını almağa kömək edir.
Pulmonoloq Əsəd Beydullayevin sözlərinə görə, bəzi hallarda yay aylarında pnevmoniya hallarının artmasının səbəblərindən biri məhz kondisionerlərlə bağlı olur. O bildirib ki, "Legionella" adlı bakteriya nəm mühitlərdə, o cümlədən kondisioner sistemlərində yaşaya bilir və müəyyən hallarda ağciyər infeksiyalarına səbəb ola bilər.
Mütəxəssislər kondisioner filterlərinin mütəmadi təmizlənməsini və cihazların texniki baxışdan keçirilməsini vacib hesab edirlər. Həmçinin gün ərzində otağın vaxtaşırı təbii şəkildə havalandırılması sağlam mühitin qorunmasına kömək edir.
Həkimlər vurğulayırlar ki, kondisioner düzgün istifadə edildikdə yay istisinin təsirlərindən qoruyan faydalı vasitədir. Lakin sadə qaydalara əməl edilmədikdə, o, görünməyən sağlamlıq problemlərinin yaranmasına səbəb ola bilər.
Geri dön