Ermənistanda seçki qalmaqalı böyüyür: Karapetyan nəticələrin ləğvini tələb etdi
Bu gün, 13:49. Yazar: vasif
Ermənistanda parlament seçkilərindən sonra siyasi gərginlik daha da artıb. Rusiyalı iş adamı Samvel Karapetyanın rəhbərlik etdiyi "Güclü Ermənistan" bloku iyunun 7-də keçirilmiş parlament seçkilərinin nəticələrinin etibarsız hesab olunması tələbi ilə Mərkəzi Seçki Komissiyasına rəsmi müraciət edib.
Müraciət ölkədə seçkilərin nəticələri ətrafında yeni müzakirələrə yol açıb. Xatırladaq ki, rəsmi nəticələrə əsasən, baş nazir Nikol Paşinyanın rəhbərlik etdiyi "Vətəndaş Müqaviləsi" partiyası 49,81 faiz səs toplayaraq qalib elan olunub.
Seçkilərdə Samvel Karapetyanın təmsil etdiyi "Güclü Ermənistan" bloku 23,29 faiz səslə ikinci yeri tutub. Keçmiş prezident Robert Koçaryanın rəhbərlik etdiyi "Ermənistan Alyansı" isə 9,94 faiz səs əldə edib. "Çiçəklənən Ermənistan" partiyası 3,996 faiz nəticə göstərərək parlamentə düşmək üçün tələb olunan minimum baryeri aşa bilməyib. Seçici fəallığı isə 58,97 faiz təşkil edib.
Siyasi dairələrdə diqqət çəkən əsas məqamlardan biri Karapetyanın bu addımının Moskvanın son açıqlamalarından dərhal sonra atılmasıdır. Rusiya Xarici İşlər Nazirliyi seçkilərdən sonra Ermənistan hakimiyyətinə qarşı sərt bəyanatlarla çıxış edib.
Rusiya XİN-in rəsmi nümayəndəsi Mariya Zaxarova seçki kampaniyasının və səsvermə prosesinin müxalifət nümayəndələrinə qarşı təzyiqlər fonunda keçdiyini iddia edib. Onun sözlərinə görə, müxalif qüvvələrin fəaliyyətinə maneələr yaradılıb və demokratik prinsiplər tam şəkildə təmin olunmayıb.
Moskvanın narahatlıqla vurğuladığı məsələlərdən biri də Rusiya ilə strateji tərəfdaşlığı dəstəkləyən siyasi qüvvələrin təzyiqlərlə üzləşməsi barədə səsləndirilən iddialardır. Rusiya tərəfi xüsusilə Avrasiya İqtisadi İttifaqı və Kollektiv Təhlükəsizlik Müqaviləsi Təşkilatında iştirakın tərəfdarı olan qüvvələrin hədəfə alındığını bəyan edib.
Analitiklər hesab edirlər ki, Karapetyanın müraciəti təkcə seçki nəticələri ilə bağlı hüquqi mübahisə deyil, həm də Ermənistanın gələcək geosiyasi istiqaməti uğrunda mübarizənin tərkib hissəsidir. Çünki seçkilərdən sonra ölkədə Qərbə inteqrasiya tərəfdarları ilə ənənəvi Rusiya yönümlü qüvvələr arasında qarşıdurmanın daha da kəskinləşdiyi müşahidə olunur.
Hazırda bütün diqqətlər Mərkəzi Seçki Komissiyasının bu müraciətlə bağlı verəcəyi qərara yönəlib. Bununla yanaşı, Ermənistan daxilində siyasi proseslərin yaxın günlərdə daha da gərginləşəcəyi ehtimal olunur. Bir çox müşahidəçilər hesab edirlər ki, seçkilərin nəticələri ətrafında yaranan mübahisələr ölkənin siyasi gündəmini uzun müddət müəyyən edə bilər.
Geri dön