Yunanıstan mediası Türkiyənin yeni müdafiə sistemindən narahatdır
Dünən, 21:00. Yazar: vasif
Türkiyənin müdafiə sənayesində əldə etdiyi son nailiyyətlər Yunanıstan mətbuatının diqqət mərkəzinə çevrilib. Xüsusilə ASELSAN tərəfindən "Polad Qübbə" konsepsiyası çərçivəsində hazırlanmış DRONDEF sistemi ilə bağlı yayılan təhlillər Afina mediasında geniş müzakirələrə səbəb olub.
Yunanıstanın tanınmış xəbər və analiz platformalarından biri olan "Pentapostagma" tərəfindən dərc edilən geniş məqalədə Türkiyənin pilotsuz uçuş aparatlarına qarşı müdafiə imkanlarının son illərdə əhəmiyyətli dərəcədə gücləndiyi vurğulanıb. Nəşr bu sistemin Egey bölgəsindəki hərbi balans baxımından diqqətlə izlənməli olduğunu qeyd edib.
“Egeyi təhdid edən Türk qübbəsi: Yunan insansız hava aparatlarını kor etməyi hədəfləyən 8 qatlı şəbəkə” başlığı ilə yayımlanan materialda DRONDEF sisteminin müxtəlif təhdidlərə qarşı çoxsəviyyəli müdafiə imkanlarına malik olduğu bildirilib. Məqalədə sistemin xüsusilə mini və mikro pilotsuz uçuş aparatlarına qarşı effektiv fəaliyyət göstərə biləcəyi vurğulanıb.
Yunan mediası Türkiyənin son illərdə həm pilotsuz uçuş aparatları, həm də anti-dron texnologiyalarına böyük investisiyalar yönəltdiyini qeyd edib. Eyni zamanda, Yunanıstanın bu sahədə müəyyən gecikmələrlə üzləşdiyi və yalnız son dövrlərdə müdafiə imkanlarını gücləndirmək istiqamətində addımlar atdığı etiraf olunub.
Analizdə ASELSAN-ın hazırladığı sistemlərin Türkiyə müdafiə sənayesinin texnoloji potensialını nümayiş etdirdiyi xüsusi vurğulanıb. Məqalədə qeyd olunur ki, iyunun 6-da keçirilən təqdimat zamanı nümayiş etdirilən DRONDEF kompleksi müasir döyüş meydanlarında geniş istifadə olunan pilotsuz uçuş aparatlarına qarşı inteqrasiya olunmuş müdafiə konsepsiyasını ortaya qoyub.
Sistemin əsas elementləri hesab edilən İHTAR, EJDERHA və GÖKBERK komplekslərinin birgə fəaliyyət göstərərək müxtəlif ölçülü pilotsuz uçuş aparatlarını aşkarlamaq, izləmək və zərərsizləşdirmək qabiliyyətinə malik olduğu bildirilib. Təhlildə bu komponentlərin koordinasiyalı fəaliyyətinin sistemin əsas üstünlüklərindən biri olduğu qeyd olunub.
Məqalədə DRONDEF sisteminin təxminən 10 kilometr məsafədə hədəfləri müəyyən edə bilməsi də xüsusi vurğulanıb. Bununla yanaşı, müxtəlif texnologiyalara əsaslanan alt sistemlərin birgə işləməsi sayəsində müdafiə imkanlarının daha da genişləndiyi bildirilib.
Yunanıstan mətbuatı ASELSAN tərəfindən həyata keçirilən son sınaqlara da diqqət çəkib. Qeyd olunub ki, "Polad Qübbə" konsepsiyasının əsas elementləri olan İHTAR, EJDERHA və GÖKBERK sistemləri müxtəlif ssenarilər üzrə keçirilən sınaqlarda müəyyən edilmiş bütün hədəfləri uğurla məhv edib.
Türkiyənin müdafiə sənayesində aparıcı şirkətlərdən biri olan ASELSAN son illərdə xüsusilə mini və mikro pilotsuz uçuş aparatlarının yaratdığı təhlükələrə qarşı çoxsaylı innovativ həllər hazırlayıb. Bu sistemlərin böyük hissəsi artıq praktiki sınaqlardan keçərək beynəlxalq auditoriyaya təqdim olunub.
Qeyd edilir ki, Gölbaşı Test Mərkəzində keçirilən son nümayişlərdə dünyanın 19 ölkəsindən gəlmiş hərbi nümayəndələr və beynəlxalq media təmsilçiləri iştirak ediblər. Təqdimat zamanı nümayiş etdirilən sistemlərin bütün tapşırıqları uğurla yerinə yetirməsi isə Türkiyənin müdafiə texnologiyalarında əldə etdiyi irəliləyişin növbəti göstəricisi kimi qiymətləndirilib.
Geri dön