İsti havalarda qidalanmanın azalması sağlamlıq üçün risk yarada bilər
Bu gün, 18:11. Yazar: vasif
Yay aylarında havaların həddindən artıq isti keçməsi bir çox insanlarda iştahanın azalmasına səbəb olur. Mütəxəssislərin fikrincə, bu hal əksər hallarda orqanizmin təbii müdafiə mexanizmi hesab edilsə də, uzun müddət davam etdikdə sağlamlıq baxımından müəyyən problemlər yarada bilər.
Həkim-ginekoloq, endokrinoloq və klinik nutrisioloq Natalya Firsovanın sözlərinə görə, yüksək temperatur şəraitində iştahanın azalması normal fizioloji reaksiyadır. Çünki yağlı və ağır qidaların həzmi zamanı orqanizm daha çox enerji sərf edir, nəticədə bədəndə əlavə istilik yaranır. İsti havalarda isə orqanizm əsas diqqətini bədən temperaturunun sabit saxlanmasına yönəldir.
Məhz buna görə yay mövsümündə insanlar daha çox yüngül qidalara üstünlük verir, iri porsiyalar və kalorili yeməklər isə əvvəlki qədər cəlbedici görünmür. Bu dəyişiklik əksər hallarda narahatlıq doğurmur və təbii qəbul edilir.
Lakin mütəxəssis xəbərdarlıq edir ki, qidalanmanın həm miqdar, həm də keyfiyyət baxımından zəifləməsi orqanizmdə vacib maddələrin çatışmazlığına gətirib çıxara bilər. Zülal, vitamin, mineral maddələr və mayenin kifayət qədər qəbul edilməməsi enerji səviyyəsinin aşağı düşməsinə, halsızlığa və ümumi zəifliyə səbəb ola bilər.
Ekspertlərin fikrincə, yay aylarında qida qəbulunun azalması fonunda orqanizmin ehtiyac duyduğu faydalı maddələrin təmin olunması xüsusi əhəmiyyət daşıyır. Əks halda diqqətin zəifləməsi, iş qabiliyyətinin aşağı düşməsi və gündəlik fəaliyyətin çətinləşməsi kimi hallar meydana çıxa bilər.
Mütəxəssislər isti günlərdə qidalanma rejiminə diqqət yetirməyi, kifayət qədər su qəbul etməyi, meyvə-tərəvəzlə zəngin menyudan istifadə etməyi və orqanizmi vacib qida elementlərindən məhrum qoymamağı tövsiyə edirlər.
Geri dön