Yumurtaları belə saxlayırsınızsa, tez xarab ola bilər
Bu gün, 18:39. Yazar: vasif
Bir çox insan yumurtaları rahatlıq baxımından soyuducunun qapısında saxlayır. Lakin mütəxəssislər xəbərdarlıq edir ki, bu vərdiş məhsulun daha tez xarab olmasına səbəb ola bilər.
Diyetoloqların sözlərinə görə, soyuducunun ən qeyri-sabit temperaturu məhz qapı hissəsində olur. Gün ərzində qapının dəfələrlə açılıb-bağlanması nəticəsində yaranan istilik dəyişiklikləri yumurtaların keyfiyyətinə mənfi təsir göstərir.
Mütəxəssislər bildirirlər ki, yumurtalar sabit temperatur olan orta rəflərdə saxlanılmalıdır. Bu, həm məhsulun təzəliyini daha uzun müddət qoruyur, həm də xarab olma riskini azaldır.
Ekspertlər başqa bir səhvə də diqqət çəkirlər. Belə ki, yumurtaların alınan kimi yuyulması onların qoruyucu təbəqəsini zəiflədə və saxlanma müddətini qısalda bilər.
Qeyd olunur ki, təkcə yumurtalar deyil, süd məhsulları, yumşaq pendirlər, kolbasa və bəzi ət məhsulları da soyuducunun qapısında saxlanılmamalıdır. Çünki temperatur dəyişiklikləri bu məhsulların da keyfiyyətinə təsir edir.
Mütəxəssislər hesab edir ki, qidaların düzgün saxlanılması həm ərzaq israfının qarşısını alır, həm də sağlamlıq risklərini minimuma endirir.
Geri dön