Azərbaycan dövlətçiliyinin xilası və sabit inkişaf yolunun tarixi əsasları
Bu gün, 11:22. Yazar: azer
15 İyun – Milli Qurtuluş Günü Azərbaycan xalqının müasir tarixində dövlət müstəqilliyinin qorunması və möhkəmləndirilməsi baxımından həlledici əhəmiyyətə malik olan tarixi mərhələ kimi qiymətləndirilir. Bu gün yalnız bir siyasi hadisəni deyil, eyni zamanda Azərbaycan dövlətçiliyinin dağılmaq təhlükəsindən xilas edilərək sabit və dayanıqlı inkişaf yoluna çıxmasını ifadə edir.
XX əsrin sonlarında Azərbaycan Respublikası müstəqilliyini bərpa etməsinə baxmayaraq, ölkədə mürəkkəb ictimai-siyasi və hərbi vəziyyət hökm sürürdü. Ermənistanın Azərbaycana qarşı hərbi təcavüzü, torpaqların işğalı, iqtisadi tənəzzül, dövlət idarəçiliyində böhran və daxili siyasi qarşıdurmalar ölkənin sabitliyini ciddi şəkildə sarsıdırdı. Dövlət institutlarının zəifliyi və idarəetmədə yaranmış boşluqlar müstəqilliyin davamlılığını təhlükə altına almışdı.
Belə bir şəraitdə xalqın təkidli tələbi ilə ümummilli lider Heydər Əliyev 1993-cü il iyunun 15-də Azərbaycan Respublikası Ali Sovetinin Sədri seçildi. Bu hadisə ölkənin siyasi tarixində dönüş nöqtəsi kimi qiymətləndirilir və sonradan 15 İyun Milli Qurtuluş Günü kimi dövlət səviyyəsində rəsmiləşdirildi. Həmin dövr dövlətçiliyin parçalanma və iflic vəziyyətindən çıxaraq sabitlik mərhələsinə qədəm qoyması ilə xarakterizə olunur.
Ulu Öndər Heydər Əliyevin siyasi rəhbərliyə qayıdışı ilə dövlət idarəçiliyində yeni mərhələ başlandı. İlk növbədə ölkədə ictimai-siyasi sabitliyin bərpası istiqamətində ardıcıl və sistemli addımlar atıldı. Dövlət institutlarının fəaliyyəti gücləndirildi, idarəetmə mexanizmləri təkmilləşdirildi və hüquqi dövlət quruculuğu prosesinə start verildi. Qanunun aliliyinin təmin olunması və dövlət strukturlarının koordinasiyalı fəaliyyəti sabitliyin əsas dayaqlarına çevrildi.
“Mənim həyatım da, fəaliyyətim də yalnız və yalnız Azərbaycanın müstəqilliyinin qorunub saxlanmasına, ölkəmizin bu ağır vəziyyətdən qalxmasına həsr olunacaqdır” fikri həmin dövrdə dövlət siyasətinin mahiyyətini və əsas istiqamətini ifadə edirdi. Bu yanaşma dövlət müstəqilliyinin qorunmasını prioritet məsələ kimi müəyyənləşdirirdi.
Dövlət idarəçiliyinin bərpası ilə paralel olaraq ictimai asayişin təmin olunması istiqamətində də mühüm tədbirlər həyata keçirildi. Hüquq-mühafizə orqanlarının fəaliyyətinin gücləndirilməsi, cinayətkarlığa qarşı mübarizənin sərtləşdirilməsi və vətəndaşların təhlükəsizliyinin təmin edilməsi ölkədə sabit mühitin formalaşmasına şərait yaratdı.
Ulu Öndər Heydər Əliyev tərəfindən həyata keçirilən siyasətin əsas istiqamətlərindən biri iqtisadi sistemin bərpası və inkişafı idi. Azərbaycanın zəngin enerji ehtiyatları milli iqtisadi strategiyanın əsasına çevrildi. Beynəlxalq neft müqavilələrinin imzalanması, xarici investisiyaların ölkəyə cəlb edilməsi və enerji ixracı üzrə yeni marşrutların formalaşdırılması iqtisadi inkişaf üçün mühüm zəmin yaratdı.
Bu dövrdə həyata keçirilən infrastruktur layihələri, nəqliyyat və kommunikasiya sisteminin inkişafı Azərbaycanın regional mövqeyini gücləndirdi. Ölkə beynəlxalq iqtisadi sistemdə etibarlı tərəfdaş kimi çıxış etməyə başladı.Sosial sahədə aparılan islahatlar da dövlət siyasətinin əsas istiqamətlərindən birinə çevrildi. Təhsil və səhiyyə sisteminin təkmilləşdirilməsi, sosial müdafiə mexanizmlərinin gücləndirilməsi və vətəndaş rifahının yaxşılaşdırılması istiqamətində mühüm addımlar atıldı. Bu proseslər dövlət-vətəndaş münasibətlərində etimadın formalaşmasına xidmət etdi.Milli Qurtuluş mərhələsi eyni zamanda dövlətçilik ideologiyasının möhkəmlənməsi ilə xarakterizə olunur. Dövlətə bağlılıq, milli birlik və vətənpərvərlik prinsipləri cəmiyyətin əsas dəyərlərinə çevrildi. Bu dövrdə formalaşan siyasi kurs sonrakı illərdə Azərbaycanın inkişaf strategiyasının ideoloji bazasını təşkil etdi.
Azərbaycan Respublikasının Prezidenti İlham Əliyev tərəfindən həyata keçirilən siyasət həmin strateji xəttin davamı kimi qiymətləndirilir. Dövlət idarəçiliyinin modernləşdirilməsi, iqtisadiyyatın şaxələndirilməsi, sosial rifahın yüksəldilməsi və beynəlxalq mövqelərin gücləndirilməsi bu siyasətin əsas istiqamətlərini təşkil edir.Müasir dövrdə Azərbaycanın regional və beynəlxalq müstəvidə mövqeləri daha da güclənmiş, dövlətin siyasi və iqtisadi potensialı əhəmiyyətli dərəcədə artmışdır. Dövlətin inkişafı güclü institusional baza, sabit siyasi sistem və milli həmrəylik üzərində formalaşmışdır.
Anar Məmmədov,
YAP Gədəbəy rayon təşkilatının əməkdaşı
Geri dön