ABŞ nəşri “CNN”in iddialarını hədəfə aldı – Bakı və Zəngəzur dəhlizi ətrafında yeni mübahisə
Dünən, 22:00. Yazar: vasif
ABŞ-nin “Responsible Statecraft” nəşri “CNN”in Azərbaycanla bağlı yaydığı məlumatları tənqid edən geniş təhlil dərc edib.
Məqalədə bildirilir ki, “CNN”in Azərbaycan ərazisinin guya İrana qarşı fəaliyyətlər üçün istifadə olunması ilə bağlı iddiaları rəsmi Bakı tərəfindən qəti şəkildə təkzib edilib. Azərbaycan Xarici İşlər Nazirliyi vurğulayıb ki, ölkə heç vaxt öz ərazisinin üçüncü dövlətə qarşı istifadəsinə icazə verməyib və verməyəcək.
Təhlildə qeyd olunur ki, bu cür məlumatların yayılması Azərbaycan-İran münasibətlərində əlavə gərginlik yaratmaq potensialına malikdir. Nəşr hesab edir ki, həm Bakı, həm də Tehran hazırkı mərhələdə açıq qarşıdurmada maraqlı deyil və regional sabitliyin qorunmasına üstünlük verir.
“Responsible Statecraft” həmçinin diqqəti ABŞ tərəfindən dəstəkləndiyi bildirilən TRIPP təşəbbüsünə yönəldib. Təhlilə görə, bu layihə Azərbaycanın Naxçıvan və Türkiyə ilə yeni nəqliyyat əlaqələrinin formalaşdırılması, eyni zamanda regionda iqtisadi inteqrasiyanın gücləndirilməsi məqsədi daşıyır.
Məqalə müəllifləri hesab edirlər ki, Cənubi Qafqazda böyük layihələrin reallaşması üçün əsas şərt sabitlik və qarşılıqlı etimaddır. Bu səbəbdən regionla bağlı yayılan mübahisəli məlumatların həm siyasi proseslərə, həm də investisiya mühitinə təsir göstərə biləcəyi vurğulanır.
Ekspertlərin fikrincə, Azərbaycan, Türkiyə, İran və digər regional oyunçular qarşıdakı dövrdə gərginlikdən yayınaraq əməkdaşlıq və nəqliyyat layihələrinin inkişafına üstünlük verməyə çalışacaqlar.
Geri dön