Region Ermənistandan addım gözləyir – Sülh üçün yeni mərhələ
Dünən, 21:14. Yazar: vasif
Ermənistanda keçirilən parlament seçkilərinin nəticələri regionda yeni siyasi mərhələnin başlanğıcı kimi qiymətləndirilir.
Deputat Aydın Mirzəzadənin fikrincə, seçkilərdə yalnız Nikol Paşinyan deyil, Ermənistan cəmiyyətində formalaşan yeni düşüncə qalib gəlib. Onun sözlərinə görə, erməni seçicisi uzun illər ölkəyə problemlər gətirən qarşıdurma siyasətindən uzaqlaşaraq daha realist yanaşmaya üstünlük verib.
Deputat hesab edir ki, Ermənistan cəmiyyətinin böyük hissəsi ölkənin gələcəyinin Azərbaycan və Türkiyə ilə normal münasibətlərdən, regional əməkdaşlıqdan və sabitlikdən keçdiyini anlayır. Bu baxımdan seçkilərin nəticələri İrəvanın qarşısında yeni məsuliyyətlər də yaradır.
Aydın Mirzəzadə vurğulayıb ki, davamlı sülh üçün Ermənistan konkret addımlar atmalıdır. Buraya ilk növbədə Azərbaycanla münasibətlərə maneə yaradan hüquqi və siyasi problemlərin aradan qaldırılması daxildir.
Onun fikrincə, Cənubi Qafqazda uzunmüddətli sabitliyin təmin olunması üçün region ölkələri arasında əməkdaşlığın gücləndirilməsi vacibdir. Ermənistanın bu prosesə real töhfə verməsi isə həm regionun, həm də ölkənin özünün maraqlarına cavab verir.
Beləliklə, seçkilərdən sonra əsas məsələ hakimiyyətin kimdə olması deyil, İrəvanın sülh və əməkdaşlıq istiqamətində hansı addımları atacağıdır. Regionun gözləntisi də məhz budur.
Geri dön