Səmada nadir hadisə – İyunun 15-də Super Təzə Ay baş verəcək
Bu gün, 12:00. Yazar: vasif
İyunun 15-də astronomiya həvəskarlarının diqqət mərkəzində olacaq maraqlı səma hadisəsi – Super Təzə Ay müşahidə ediləcək.
Mütəxəssislərin məlumatına görə, Ay həmin gün həm Yerə ən yaxın nöqtələrdən biri olan perigeyə yaxınlaşacaq, həm də Təzə Ay fazasına daxil olacaq. Bu iki hadisənin qısa zaman fərqi ilə baş verməsi astronomiyada “Super Təzə Ay” adlandırılır.
Ay Bakı vaxtı ilə saat 03:19-da Yerə təxminən 357 195 kilometr məsafədə perigey nöqtəsindən keçəcək. Bir neçə saat sonra, saat 06:56-da isə Təzə Ay fazası başlayacaq.
Astronomlar bildirirlər ki, Təzə Ay zamanı Ay Yer ilə Günəş arasında yerləşdiyi üçün onun işıqlanan hissəsi Yerə görünmür. Buna görə də Super Təzə Ay adi müşahidəçilər tərəfindən vizual şəkildə görünməsə də, elmi baxımdan maraqlı hadisə hesab olunur.
Bu dövrdə Ay işığının olmaması gecə səmasını daha qaranlıq edir və qalaktikalar, dumanlıqlar, ulduz topaları kimi zəif kosmik obyektlərin müşahidəsi üçün əlverişli şərait yaradır.
Mütəxəssislər qeyd edirlər ki, Super Təzə Ay Yerə yaxın məsafədə baş versə də, adi insanlar bu yaxınlaşmanı gözlə müşahidə edə bilməyəcəklər. Buna baxmayaraq, hadisə astronomik təqvimin diqqət çəkən məqamlarından biri hesab olunur.
Geri dön