Vətəndaşlara vacib xəbərdarlıq: Bu saytlara məlumatlarınızı verməyin
Bu gün, 18:11. Yazar: vasif
Dövlət qurumlarının adından istifadə edən və vətəndaşlardan şəxsi və ya bank kartı məlumatları tələb edən internet saytları ilə bağlı xəbərdarlıq edilib.
Məlumata görə, son vaxtlar sosial şəbəkələrdə vergi borclarının guya güzəştli şərtlərlə ödənilməsini təklif edən və rəsmi dövlət qurumlarının vizual üslubunu təqlid edən internet səhifələri yayılmağa başlayıb. Bu cür resursların vətəndaşları aldatmaq məqsədi daşıdığı bildirilir.
Mütəxəssislər qeyd edirlər ki, vergi öhdəlikləri, ödənişlər və digər rəsmi məlumatlar yalnız dövlət qurumlarının rəsmi platformalarından əldə edilməlidir. Ödəniş əməliyyatları isə yalnız qanunvericiliklə müəyyən edilmiş rəsmi elektron xidmətlər, banklar və ya ödəniş terminalları vasitəsilə həyata keçirilməlidir.
Vətəndaşlara şübhəli internet səhifələrinə daxil olmamaq, naməlum mənbələrə bank kartı məlumatlarını təqdim etməmək və sosial şəbəkələrdə yayılan saxta elanlara etibar etməmək tövsiyə olunur.
Xüsusilə vurğulanır ki, dövlət qurumları heç bir halda internet üzərindən vətəndaşlardan bank kartı rekvizitlərini və ya məxfi maliyyə məlumatlarını tələb etmir.
Mütəxəssislər xəbərdarlıq edirlər ki, şəxsi məlumatların üçüncü şəxslərə ötürülməsi maliyyə itkiləri və kiberdələduzluq riskini artırır. Buna görə də yalnız rəsmi mənbələrdən istifadə etmək və məlumatların təhlükəsizliyinə diqqət yetirmək vacibdir.
Geri dön