Manaf Manafov: "Bakı Enerji Həftəsi Azərbaycanın enerji sektorunda son illər ərzində keçdiyi inkişaf yolunu aydın şəkildə əks etdirir”
Bu gün, 11:56. Yazar: azer
Bakı Enerji Həftəsinin açılış mərasimində Cənab Prezident İlham Əliyevin səsləndirdiyi fikirlər bir daha göstərdi ki, Azərbaycan artıq yalnız zəngin enerji ehtiyatlarına malik dövlət deyil, həm də qlobal enerji təhlükəsizliyinin formalaşmasında mühüm rol oynayan strateji tərəfdaşdır. Müstəqilliyin ilk illərində ciddi siyasi, iqtisadi və sosial çətinliklərlə qarşılaşan Azərbaycanın bu gün dünya enerji xəritəsində mühüm mövqeyə sahib olması təsadüfi deyil. Bu nailiyyət uzaqgörən dövlət siyasətinin, milli maraqlara əsaslanan iqtisadi kursun və səmərəli idarəetmə modelinin nəticəsi kimi qiymətləndirilir.
“Bakı Enerji Həftəsi” çərçivəsində təşkil olunan tədbirlər də nümayiş etdirdi ki, Azərbaycanın enerji siyasəti artıq yalnız neft və qaz hasilatı ilə məhdudlaşmır. Bu siyasət enerji təhlükəsizliyi, yaşıl enerji keçidi, beynəlxalq əməkdaşlıq və regional inteqrasiyanın mühüm tərkib hissəsinə çevrilib. Ölkə Prezidenti çıxışında diqqət mərkəzində olan əsas məsələlərdən biri Azərbaycanın enerji tarixinin başlanğıc mərhələsinə nəzər salınması idi. Dövlət başçısı xatırlatdı ki, 1994-cü ildə imzalanan “Əsrin müqaviləsi” və onun ardınca həyata keçirilən layihələr ölkənin gələcək inkişaf istiqamətini müəyyən etdi. Həmin dövrdə Azərbaycan siyasi qeyri-sabitlik, iqtisadi geriləmə, işğal və məcburi köçkün problemi ilə üzləşmişdi. Dövlət büdcəsi zəif, enerji təminatı isə xarici asılılıq şəraitində idi. Belə bir vaxtda Ulu Öndər Heydər Əliyevin rəhbərliyi ilə qəbul edilən strateji qərarlar Azərbaycanın inkişafının əsasını formalaşdırdı. Xəzərin enerji ehtiyatlarının beynəlxalq şirkətlər üçün açılması ölkəyə böyük həcmdə sərmayə axınını təmin etdi və Azərbaycanın dünya iqtisadi sisteminə inteqrasiyasını sürətləndirdi.
Bunları aia.az-a açıqlamasında Nərimanov Rayon Mənzil-Kommunal Təsərrüfatı Birliyinin rəisi, Yeni Azərbaycan Partiyasının üzvü Manaf Manafov deyib.
Fikirlərini davam etdirən hakim partiya təmsilçisi qeyd edib ki, Cənab Prezident İlham Əliyevin çıxışında xüsusi vurğulanan məsələlərdən biri də təbii sərvətlərin idarə olunması ilə bağlı idi. Dövlət başçısı açıq şəkildə bildirdi ki, dövlətlərin dəyəri yalnız malik olduqları enerji ehtiyatları ilə deyil, həmin sərvətlərdən əldə edilən gəlirləri necə yönəltmələri ilə müəyyən edilir. Bu fikir Azərbaycanın son otuz ildə formalaşdırdığı inkişaf modelinin əsas mahiyyətini əks etdirir. Neft gəlirləri hesabına ölkədə müasir yollar salınıb, məktəblər və xəstəxanalar tikilib, sosial infrastruktur yenilənib, regionların inkişafı sürətləndirilib. Bununla yanaşı, güclü ordu quruculuğuna da ciddi maliyyə resursları ayrılıb. Prezident İlham Əliyev çıxışında xüsusi qeyd etdi ki, əgər Azərbaycan iqtisadi potensialını formalaşdırmasaydı, işğal altındakı torpaqların azad edilməsi də mümkün olmazdı. Bu baxımdan enerji siyasəti ilə Vətən müharibəsində qazanılan tarixi Zəfər arasında birbaşa bağlılıq mövcuddur.
Azərbaycanın enerji strategiyasının mühüm nəticələrindən biri ölkənin sadəcə enerji ixrac edən dövlətdən qlobal enerji təhlükəsizliyinin təminatçılarından birinə çevrilməsi oldu. Bakı–Tbilisi–Ceyhan, Bakı–Supsa, Cənubi Qafqaz Boru Kəməri, TANAP və TAP layihələri bu gün Avrasiya enerji xəritəsini dəyişdirən geosiyasi təşəbbüslər kimi dəyərləndirilir. Prezident İlham Əliyevin qeyd etdiyi kimi, əvvəllər Azərbaycan qazını alan ölkələrin sayı daha az idisə, bu gün həmin göstərici 16-ya yüksəlib və onların mühüm hissəsi Avropa ölkələridir. Bu fakt Azərbaycanın Avropanın enerji təhlükəsizliyində artan rolunu açıq şəkildə nümayiş etdirir. Xüsusilə son illərdə qlobal enerji bazarında yaşanan çətinliklər fonunda Azərbaycanın etibarlı tərəfdaş imici daha da möhkəmlənib. Avropa üçün Azərbaycan qazı artıq yalnız alternativ enerji mənbəyi deyil, strateji əhəmiyyət daşıyan təminat vasitələrindən birinə çevrilib.
Çıxışın diqqət çəkən istiqamətlərindən biri də qlobal enerji siyasətində müşahidə olunan dəyişikliklərlə bağlı idi. Prezident İlham Əliyev enerji sektoruna münasibətdə tətbiq olunan ikili yanaşmaları tənqid edərək bildirdi ki, uzun illər neft və qaz istehsal edən ölkələr əsassız ittihamlarla üzləşib və müəyyən hallarda günahlandırılıb. Dövlət başçısı bu kontekstdə beynəlxalq enerji siyasətində daha praqmatik yanaşmanın vacibliyini vurğuladı. Bu mövqe Azərbaycanın uzun illər müdafiə etdiyi prinsipə uyğundur. Rəsmi Bakı hesab edir ki, enerji təhlükəsizliyi ilə yaşıl enerji keçidi qarşı-qarşıya qoyulmamalı, əksinə bir-birini tamamlayan istiqamətlər kimi inkişaf etdirilməlidir.
Prezident İlham Əliyevin çıxışında gələcəyin enerji gündəliyi də aydın şəkildə ifadə olundu. Dövlət başçısı vurğuladı ki, Azərbaycanın təsdiqlənmiş qaz ehtiyatları uzun illər ərzində həm ölkənin, həm də tərəfdaşlarının tələbatını ödəməyə kifayət edir. Bununla yanaşı, Azərbaycan yaşıl enerji sahəsinə də böyük investisiyalar yatırır. Günəş və külək enerjisi üzrə istehsal gücünün mərhələli şəkildə artırılması planlaşdırılır. Qarabağ və Şərqi Zəngəzurda istifadəyə verilən hidroenerji layihələri də bu strategiyanın vacib hissəsidir. Azad edilmiş ərazilərin “yaşıl enerji zonası”na çevrilməsi Azərbaycanın enerji siyasətində yeni mərhələnin başlanğıcı kimi qiymətləndirilir.
Müsahibimiz onu da bildirib ki Cənab Prezident İlham Əliyevin çıxışında diqqət çəkən digər mühüm məqam enerji diplomatiyasının nəticələri ilə bağlı idi. Azərbaycanın coğrafi baxımdan açıq dənizə çıxışı olmasa da, bu gün enerji məhsulları çoxsaylı ölkələrə çatdırılır. Bu isə yalnız iqtisadi potensialın deyil, düşünülmüş xarici siyasətin nəticəsidir. Dövlət başçısının vurğuladığı kimi, enerji layihələrinin həyata keçirilməsi üçün təkcə qonşularla deyil, daha geniş coğrafiyada etibarlı münasibətlər qurmaq tələb olunur. Son otuz ildə Azərbaycanın yürüdüyü balanslaşdırılmış xarici siyasət də məhz bu məqsədə xidmət edib. Formalaşan geniş əməkdaşlıq platformaları ölkənin regional lider statusunu daha da möhkəmləndirir.
Bakı Enerji Həftəsində səsləndirilən fikirlər bir daha təsdiqlədi ki, Azərbaycan enerji resurslarını yalnız iqtisadi qazanc mənbəyi kimi deyil, dövlət quruculuğunun, milli təhlükəsizliyin, beynəlxalq nüfuzun və gələcək inkişafın əsas vasitələrindən biri kimi qiymətləndirir. Son otuz ilin təcrübəsi sübut edib ki, enerji sərvətləri yalnız düzgün idarə olunduqda dövlətin gücünə çevrilə bilir. Azərbaycan da məhz bu modeli formalaşdıraraq enerji ehtiyatlarını iqtisadi tərəqqiyə, iqtisadi inkişafı güclü orduya, güclü ordunu isə tarixi Zəfərə çevirə bilib. Bu gün ölkə yeni inkişaf mərhələsinə daxil olur. Neft və qazdan əldə olunan imkanlar yaşıl enerji, regional bağlantılar və qlobal enerji təhlükəsizliyinə xidmət edən yeni strategiyanın təməlini təşkil edir- deyə, Manaf Manafov fikirlərini tamamlayıb.
Geri dön