Paşinyana qarşı iddia olunan sui-qəsd planında yeni detal ortaya çıxdı
Bu gün, 14:27. Yazar: vasif
Ermənistanda Baş nazir Nikol Paşinyana qarşı hazırlandığı iddia edilən sui-qəsd planı ilə bağlı istintaqda yeni məlumatlar açıqlanıb. Hüquq-mühafizə orqanlarının yaydığı məlumata görə, iş üzrə əsas şübhəlilərdən biri müəyyən edilib.
İstintaqın versiyasına əsasən, xaricdə yaşayan Ermənistan vətəndaşı M.M. daha bir neçə nəfərlə birlikdə Paşinyanın hərəkət marşrutları və səfərləri barədə məlumat toplamaqla məşğul olub. Bildirilir ki, qrup üzvləri şəxsiyyətlərini gizlətmək üçün xüsusi vasitələrdən istifadə edib və baş nazirə qarşı təhdid xarakterli videomüraciət hazırlayaraq internetdə yayıblar.
Rəsmi məlumata görə, həmin videoların məqsədi seçki kampaniyası dövründə siyasi proseslərə təsir göstərmək və Paşinyanın fəaliyyətinə mane olmaq olub. İstintaq çərçivəsində bir neçə ağır maddə üzrə cinayət işi açıldığı bildirilir.
Qeyd olunur ki, sözügedən məsələ bir müddət əvvəl sosial şəbəkələrdə yayılan və üzlərini gizlədən şəxslərin yer aldığı videodan sonra gündəmə gəlib. Həmin görüntülər Ermənistanda geniş müzakirələrə səbəb olmuşdu.
Nikol Paşinyan daha əvvəl bu hadisəyə münasibət bildirərək təhdidlərin araşdırılacağını və qanunu pozan şəxslərin məsuliyyətə cəlb ediləcəyini bəyan etmişdi.
Hazırda istintaq tədbirləri davam edir və hüquq-mühafizə orqanları hadisənin bütün təfərrüatlarını araşdırır.
Geri dön