Nüfuzlu “Gallup” açıqladı: Paşinyan seçkidə belə uduzacaq...
Bu gün, 21:43. Yazar: vasif
ABŞ-nin nüfuzli sorğu mərkəzi hakim partiyanın 28,8%, dörd müxalif qüvvəsinin isə birlikdə 41,5% səs toplaya biləcəyini elan etdi
Ermənistanda hakim “Vətəndaş Müqaviləsi” partiyası üçün əsas risk 50 faizdən çox səs toplaya bilməməkdir. Bu isə təkcə seçki nəticəsi deyil, bütövlükdə hakimiyyətin taleyini müəyyən edə biləcək kritik hədd hesab olunur.
Əgər seçkilər bu bazar günü keçirilsəydi, sorğuda iştirak edənlərin 28,8%-i hakim “Vətəndaş Müqaviləsi” partiyasına səs verməyə hazır olduğunu bildirib. “Güclü Ermənistan” blokuna 14,9%, “Ermənistan” blokuna 12,1%, “Çiçəklənən Ermənistan” partiyasına 8,7%, “Birlik Qanadları” partiyasına isə 5,8% dəstək ifadə olunub.
Bu barədə mayın 22-də jurnalistlərlə görüşdə “Gallup International Association” təşkilatının Ermənistandakı nümayəndəliyinin rəhbəri Aram Navasardyan sorğunun nəticələrini təqdim edərkən bildirib.
Beləliklə, parlamentə keçid baryerini aşan dörd müxalif qüvvə birlikdə 41,5% səs toplaya bilər, halbuki hakim partiyanın göstəricisi 28,8%-dir.
Bəllidir ki, müxalifət seçkilərdə vahid blok kimi deyil, ayrı-ayrı iştirak etmək qərarı həm risk, həm də imkan yaradır. Bu bir tərəfdən səslərin parçalanması ehtimalı var. Digər tərəfdən isə müxtəlif elektorat qruplarını cəlb etmək baxımından bu taktika daha effektiv ola bilər. Hakim partiya səslərin yarısından çoxunu toplaya bilmədikdə, müxalif qüvvələrin birləşməsi nəticəsində hakimiyyət dəyişiklikləri baş verib. “Gallup”un sorğusunun nəticələri də eyni modelin bu dəfə parlament seçkilərində təkrarlanmasını mümkün hesab edir.
Yada salaq ki, “Gallup International” bir müddət əvvəl Ermənistan ofisi seçkilərdə təxminən 60% iştirak proqnozlaşdırsa da, ekspertlər bu rəqəmi real hesab etmir. Onların fikrincə, yüksək fəallıq hakimiyyət üçün əlavə risk yarada bilər. Çünki narazı elektoratın səfərbər olması nəticələri hakim partiyanın əleyhinə dəyişə bilər.
“Gallup International Association” tərəfindən təqdim olunan rəqəmlər göstərir ki, hakim “Vətəndaş Müqaviləsi” partiyası hələ də ayrı-ayrılıqda ən güclü siyasi qüvvə olaraq qalır. 28,8% ciddi göstəricidir və bu, Nikol Paşinyan komandasının cəmiyyət daxilində hələ də müəyyən sosial dayaqlara malik olduğunu təsdiqləyir.
Lakin əsas diqqət çəkən məqam müxalifətin ümumi potensialıdır. Ayrı-ayrılıqda parçalanmış müxalif bloklar birlikdə 41,5% toplayırsa, bu, real siyasi alternativin mövcudluğundan xəbər verir. Problem isə klassikdir:
Ermənistan müxalifəti uzun illərdir vahid platforma və koordinasiya problemi yaşayır. Bu səslərin seçkiyə qədər konsolidasiya olunmaması halında, onların üstünlüyü kağız üzərində qalacaq.
Digər tərəfdən, sorğunun metodologiyası da nəzərə alınmalıdır. Cəmi 1102 nəfərlik telefon sorğusu müəyyən tendensiyanı göstərsə də, ümumi elektoratı tam əks etdirməyə bilər. Üstəlik, belə sorğularda “qəti qərar verməmiş” seçicilərin payı açıqlanmır ki, bu da nəticələrin dəyişkənliyini artırır.
Bu rəqəmlər bir tərəfdən hakimiyyətin zəifləmədiyini, digər tərəfdən isə müxalifətin potensial olaraq daha geniş sosial baza topladığını göstərir. Amma həlledici faktor yenə də siyasi təşkilatlanma, seçkiyə qədər ittifaqların qurulması və kampaniyanın effektivliyindən asılı olacaq. Ermənistan siyasətində əsas sual dəyişməz qalır: parçalanmış müxalifət real hakimiyyət alternativinə çevrilə biləcəkmi?
Sonda qeyd edək ki, “Gallup” amerikalı sosioloq George Gallup tərəfindən yaradılmış nüfuzlu ABŞ ictimai rəy institutudur. 1935-ci ildə təsis edilib, daxili və xarici siyasət məsələləri üzrə əhalinin müntəzəm sorğularını keçirir və dünyada ictimai rəyin vəziyyəti haqqında ən etibarlı məlumat mənbələrindən biri kimi beynəlxalq nüfuza malikdir.
Geri dön