Volodindən Paşinyana sərt mesaj – “Rusiyanın imkanlarından istifadə edib Moskvanı hədəf alır”
Bu gün, 19:00. Yazar: vasif
Vyacheslav Volodin Ermənistanın baş naziri Nikol Pashinyan barədə kəskin açıqlamalar verərək onu Rusiyaya qarşı qeyri-dost siyasət aparmaqda ittiham edib. Rusiya Dövlət Dumasının sədri bildirib ki, İrəvanın son dövrlərdə atdığı addımlar Moskva ilə münasibətlərin ruhuna uyğun gəlmir.
Volodin öz Telegram kanalında qeyd edib ki, dövlətlərarası münasibətlər qarşılıqlı hörmət, daxili işlərə qarışmamaq və faydalı əməkdaşlıq prinsipləri əsasında qurulmalıdır. Onun sözlərinə görə, Ermənistan rəhbərliyinin davranışı bu prinsiplərlə ziddiyyət təşkil edir.
Rusiya parlamentinin sədri vurğulayıb ki, Moskva uzun illər Ermənistana həm iqtisadi, həm də sosial baxımdan ciddi dəstək göstərib. O bildirib ki, minlərlə Ermənistan vətəndaşı Rusiyada işləmək və özünü reallaşdırmaq imkanı əldə edib, lakin buna baxmayaraq rəsmi İrəvanın son addımları Kreml tərəfindən narazılıqla qarşılanır.
Vyacheslav Volodin xüsusilə Ermənistanın Avropa İttifaqı ilə yaxınlaşma siyasəti, Beynəlxalq Cinayət Məhkəməsinin yurisdiksiyasını tanıması və Qərbə inteqrasiya istiqamətində atdığı addımları tənqid edib. O qeyd edib ki, Moskva regionda baş verən proseslərə biganə qala bilməz.
Volodin həmçinin bildirib ki, Ermənistanın Avrasiya İqtisadi İttifaqında qalmaq istəyi daha çox iqtisadi maraqlarla bağlıdır. Onun sözlərinə görə, Ermənistan ittifaqda iştirak etdiyi müddətdə ölkənin iqtisadi göstəricilərində ciddi artım qeydə alınıb.
Rusiya rəsmisi əlavə edib ki, Moskva Ermənistana qazı Avropa ölkələri ilə müqayisədə dəfələrlə ucuz qiymətə təqdim edir. Buna baxmayaraq, Kremlin Paşinyan hakimiyyətindən “qeyri-səmimi münasibət və siyasi xəyanət” gördüyünü iddia edib.
“Bu şəkildə münasibət qurmaq mümkün deyil”, – deyə Volodin bildirib və Ermənistan rəhbərliyinə açıq mesaj göndərib.
Geri dön