İranda SU BÖHRANI DƏRİNLƏŞİR – 35 Milyon İnsan Təhlükə Altında
Bu gün, 19:39. Yazar: vasif
Tehranda son günlər yağan yağışlara baxmayaraq, paytaxtı su ilə təmin edən anbarlardakı ehtiyatların kritik səviyyədə qalması ciddi narahatlıq yaradıb.
Məlumata görə, İran hökuməti yay mövsümündə böyük su çatışmazlığı riskinin qarşısını almaq üçün həm dövlət qurumlarının, həm də vətəndaşların ciddi əməkdaşlığına ehtiyac olduğunu bildirir.
Tehran Şəhər Şurasının Səhiyyə, Ətraf Mühit və Şəhərsalma Komitəsinin sədri Mehdi Pirhadi açıqlamasında qeyd edib ki, son yağıntılar su anbarlarındakı səviyyəni normal həddə çatdırmağa kifayət etməyib.
Onun sözlərinə görə, hazırda təxminən 35 milyon insanın yaşadığı 10-a yaxın əyalətdə yağıntı miqdarı çoxillik orta göstəricilərdən xeyli aşağı olaraq qalır. Bu isə yaxın aylarda daha ciddi su böhranı ehtimalını artırır.
Ekspertlər xəbərdarlıq edirlər ki, əgər quraqlıq davam edərsə, İranın bəzi bölgələrində içməli su problemi, kənd təsərrüfatında ciddi itkilər və sosial gərginlik riski yarana bilər.
Geri dön