Təhsilin "Böyük Səhnəsi"ndə 7 İl: Emil Tağızadə ilə
Bu gün, 14:34. Yazar: azer
Ölkənin ən böyük rəqəmsal və ictimai təhsil platforması olan "Təhsil Forumu" 7 yaşını qeyd edir. Bu illər ərzində bir sosial şəbəkə qrupunun necə beynəlxalq səviyyəli bir hərəkata çevrildiyini, Finlandiyadan Çinə qədər uzanan əməkdaşlıq körpülərini yaradan rəhbəri Emil Tağızadə ilə söhbətləşdik.
– Emil müəllim, 7 il əvvəl bu yola çıxanda "Təhsil Forumu"nun Finlandiya və ya Sinqapurdan spikerləri bir araya gətirəcək qədər böyüməsini xəyal etmişdinizmi?
– Həmişə böyük hədəflərimiz olub, amma bu gün gəldiyimiz nöqtə Azərbaycan müəlliminin gücünün və birliyinin göstəricisidir. 7 il əvvəl bir "Salam" ilə başladıq, bu gün isə beynəlxalq arenada sözümüzü deyirik. Biz təkcə yerli təcrübəni paylaşmırıq, həm də dünya təhsilinin nəbzini Azərbaycan müəllimi üçün əlçatan etmişik.
– Beynəlxalq Forumlarınız artıq bir brendə çevrilib. Dünyanın ən qabaqcıl təhsil sistemlərinə malik ölkələrindən spikerləri cəlb etməyi necə bacardınız?
– Bizim üçün təhsil sərhəd tanımır. Təşkil etdiyimiz beynəlxalq forumlara Finlandiya, Sinqapur, Çin və Türkiyə kimi təhsil nəhənglərindən ekspertlər, spikerlər dəvət etdik. Məqsədimiz o idi ki, bizim müəllimlər Sinqapurun riyaziyyat metodikasını, Finlandiyanın fenomen əsaslı öyrənmə modelini birbaşa birinci mənbədən eşitsinlər. Bu dialoq Azərbaycan müəlliminin dünya görüşünü genişləndirməklə yanaşı, həm də beynəlxalq təcrübənin lokallaşdırılmasına xidmət etdi.
– Platformanızın daxilində "Müəllimləri Tanıyaq", "Mənim Məktəbim" və "Mənim Uğur Hekayəm" kimi silsilə layihələr var. Bu layihələrin fəlsəfəsi nədən ibarətdir?
– Bu layihələr bizim "insan mərkəzli" yanaşmamızın məhsuludur:
"Müəllimləri Tanıyaq": İllərlə küncdə-bucaqda qalan, fədakar, amma tanınmayan müəllimlərimizi cəmiyyətə təqdim etdik. Onların hər biri bir qəhrəmandır.
"Mənim Məktəbim": Məktəblərimizin ruhunu, ordakı mühiti və uğurları ön plana çıxardıq. Hər bir məktəb bir ocaqdır və biz o ocağın işığını hamıya göstərdik.
"Mənim Uğur Hekayəm": Gənc müəllimlərə motivasiya vermək üçün təcrübəli həmkarlarının keçdiyi çətin, amma uğurlu yolları işıqlandırdıq. Biz sübut etdik ki, uğur təsadüf deyil, əməyin nəticəsidir.
– Fənn müəllimlərinin həmrəyliyi məsələsi də diqqət çəkir. Riyaziyyat, İnformatika, Xarici dil və digər fənlər üzrə ayrıca forumlar keçirmək ideyası haradan yarandı?
– Hər bir fənnin öz dili, öz çətinlikləri və öz icması var. Biz gördük ki, müəllimlərin daha spesifik müzakirələrə ehtiyacı var. Məhz buna görə də ayrı - ayrı vaxtlarda bütün fənlər üzrə müəllimlərin Həmrəylik Forumlarını və fənn birləşmələrini təşkil etdik. Bu forumlarda müəllimlər metodik yenilikləri bölüşür, çətin mövzuların izahını müzakirə edir və vahid bir güc kimi çıxış edirlər. Bu həmrəylik dərsliklərin təkmilləşdirilməsindən tutmuş, tədris keyfiyyətinin artırılmasına qədər böyük bir zəncirvari effekt yaradır.
– Emil müəllim, "Təhsil Forumu"nun bugünkü gücünü bir cümlə ilə necə ifadə edərdiniz?
– "Təhsil Forumu" Azərbaycan müəlliminin özünəinam platformasıdır. Biz 7 il əvvəl bir toxum səpdik, bu gün isə o toxum beynəlxalq budaqları olan, hər fənni və hər uğuru qucaqlayan nəhəng bir çinara çevrilib.
– Gələcək 7 ildə bizi nələr gözləyir?
– Daha rəqəmsal, daha innovativ və daha qlobal layihələr. Süni intellekt layihələrimiz, yeni beynəlxalq tərəfdaşlıqlarımız və müəllimimizin rifahı üçün hazırladığımız yeni sürprizlər yoldadır. 7 illik yolumuzda bizimlə olan hər bir müəllimə sonsuz təşəkkürümü bildirirəm.
Geri dön