Boltondan sərt mesaj: İranla nüvə danışıqları nəticəsiz qalacaq – “Vaxt itkisidir”
Bu gün, 10:00. Yazar: vasif
ABŞ Prezidentinin milli təhlükəsizlik üzrə sabiq müşaviri Con Bolton beynəlxalq ictimaiyyətin İranla apardığı nüvə danışıqlarını kəskin tənqid edərək, bu prosesin real nəticə verməyəcəyini bildirib.
Boltonun sözlərinə görə, İranın nüvə proqramı ilə bağlı aparılan müzakirələr “yalnız vaxt itkisi” xarakteri daşıyır və Tehranın strateji məqsədlərində ciddi dəyişiklik yoxdur.
“İran rəhbərliyi onilliklər əvvəl nüvə silahına sahib olmaq barədə qərar verib və bu xəttdən geri çəkildiklərinə dair heç bir real sübut yoxdur”, – deyə o vurğulayıb.
Sabiq müşavir hesab edir ki, Tehran diplomatik platformalardan əsasən sanksiyaların təsirini yumşaltmaq və vaxt qazanmaq üçün istifadə edir. Onun fikrincə, Qərb ölkələri İran məsələsində daha sərt və prinsipial mövqe tutmalıdır.
Boltonun bu açıqlaması bölgədə gərginliyin artdığı, xüsusilə Hörmüz boğazı ətrafında hərbi-siyasi vəziyyətin həssaslaşdığı bir dövrdə diqqət çəkir. Ekspertlər bildirirlər ki, bu cür bəyanatlar ABŞ daxilində “sərt xətt” tərəfdarlarının mövqeyini gücləndirə bilər.
Hazırda Vaşinqtonun bu açıqlamalara rəsmi reaksiyası gözlənilir. Tehran tərəfi isə Con Boltonun iddialarına hələlik cavab verməyib.
Geri dön