“Smartfonlar yuxumuzu oğurlayır” – mütəxəssisdən ciddi xəbərdarlıq
Bu gün, 20:30. Yazar: vasif
Nevropatoloq Kəmalə İsmayılova bildirib ki, gecə saatlarında smartfon və sosial şəbəkələrdən aktiv istifadə yuxu rejimini ciddi şəkildə pozur və orqanizmin bərpa prosesinə birbaşa təsir göstərir.
Mütəxəssisin sözlərinə görə, ekranlardan yayılan mavi işıq melatonin hormonunun ifrazını azaldır. Bu hormon yuxu-oyanıqlıq ritmini tənzimlədiyi üçün onun azalması yuxuya getməni gecikdirir və dərin yuxu fazalarını zəiflədir. Nəticədə insan səhər yorğun oyanır, diqqət dağınıqlığı və emosional gərginlik hiss edir.
İsmayılova əlavə edib ki, sosial şəbəkələrdə davamlı informasiya axını beyində dopamin ifrazını artırır və bu da “asılılıq dövrü” yaradır. İnsan daha çox stimul axtardıqca telefon istifadəsi artır, bu isə yuxu müddətini azaldır və gecə istirahətini pozur.
Onun fikrincə, bu vəziyyət təkcə yuxu keyfiyyətinə deyil, həm də yaddaş, diqqət və qərarvermə qabiliyyətinə mənfi təsir göstərir. Uzunmüddətli dövrdə isə əsəbilik, təşviş və emosional balanssızlıq kimi problemlər yarana bilər.
Mütəxəssis vurğulayıb ki, yuxu rejiminin pozulması immun sistemini də zəiflədir və gündəlik enerji səviyyəsini aşağı salır. Buna görə də gecə saatlarında ekran istifadəsinin məhdudlaşdırılması sağlam həyat tərzi üçün vacib hesab olunur.
Geri dön