Filtrlər tarix olur: "İnstaqram"da yeni dövr
Dünən, 19:12. Yazar: vasif
"Instagram" şirkəti ani və təbii fotoların paylaşılması üçün nəzərdə tutulmuş yeni "Instants" tətbiqini sınaqdan keçirməyə başlayıb.
aia.Az TechCrunch-a istinadən xəbər verir ki, hazırda İspaniya və İtaliyada istifadəyə verilən xidmət, istifadəçilərə fərqli bir təcrübə vəd edir.
"Instants" tətbiqinin əsas xüsusiyyəti paylaşılan fotoların yalnız bir dəfəyə məxsus izlənilə bilməsidir. Bu fotolar sistemdə cəmi 24 saat qalır. Tətbiqin digər maraqlı tərəfi isə fotoların yalnız daxili kamera vasitəsilə, o an çəkilməsidir. İstifadəçilər qalereyadan foto yükləyə və ya ciddi redaktə (filtr) edə bilməzlər; yalnız qısa mətn əlavə etməyə icazə verilir.
Mütəxəssislərin fikrincə, bu yeni platforma "Snapchat" və "BeReal" kimi tətbiqlərin uğurundan ilhamlanıb. "Instagram"ın əsas tətbiqindəki "ideal və redaktə olunmuş" kontentdən fərqli olaraq, "Instants" daha səmimi və anlıq ünsiyyət vasitəsi kimi düşünülüb.
Tətbiq həm iOS, həm də Android platformalarında mövcuddur. Paylaşımları yalnız qarşılıqlı izləyicilərə və ya "Yaxın dostlar" siyahısına göndərmək mümkündür. "Meta" rəsmiləri layihənin hələlik eksperimental mərhələdə olduğunu və istifadəçi rəylərinə əsasən təkmilləşdiriləcəyini bildiriblər.
Geri dön