Kəndləri xilas etmək planı: İtaliya evləri su qiymətinə paylayır
Dünən, 23:32. Yazar: vasif
İtaliyanın Viçentsa əyalətinin şimalındakı on bələdiyyə köhnəlmiş daşınmaz əmlakı simvolik olaraq 1 avroya satışa çıxarıb.
aia.az-ın leggo.it saytına istinadən məlumatına görə, təşəbbüsün məqsədi dağlıq rayonlara həyatı qaytarmaq və əhalinin köçünün qarşısını almaqdır.
Layihə "Pasubio Pikkole Dolomiti" Dağ İcmaları Birliyi tərəfindən "Pnrr Green Communities" proqramı çərçivəsində həyata keçirilib. Müraciət müddəti aprelin 16-da başa çatsa da, maraq gözləniləndən çox olub: 78 rəsmi təklif daxil olub ki, onlardan doqquzu xaricdən, beşi isə İtaliyada yaşayan əcnəbilərdən gəlib.
İstifadəsiz hesab edilən 385 obyektdən 24 bina faktiki olaraq satışa çıxarılıb. Birliyin prezidenti və Monte di Malonun meri Moze Skvartson layihəni "pula deyil, həyata qoyulan investisiya" adlandırıb.
"Əsas məqsəd müasirlik və rahatlıq arxasınca qaçaraq boşalmış yerlərə insanları geri qaytarmaqdır", — deyə o qeyd edib.
Yenidənqurma işlərinə sərmayə qoymağa hazır olan alıcıların yekun siyahısı may ayının əvvəlində dərc olunacaq.
Geri dön