Paşinyan: “Qarabağ xətti davam etsə, Azərbaycanla sülh mümkün deyil” – konstitusiya ilə bağlı sərt mesaj
Bu gün, 13:00. Yazar: vasif
Ermənistan Baş naziri Nikol Paşinyan bildirib ki, köhnə siyasi yanaşmalar davam etdirilərsə, Azərbaycanla sülh prosesinin irəliləməsi mümkün olmayacaq.
O, yeni konstitusiya layihəsində Müstəqillik Bəyannaməsinə istinadın çıxarılmasını təklif edərək, bunun “Qarabağ hərəkatı”nın siyasi gündəmdə saxlanılmasının qarşısını almağa yönəldiyini deyib.
Paşinyanın sözlərinə görə, həmin istinadın qalması Ermənistanın keçmiş münaqişə xəttini davam etdirməsi kimi yozula bilər və bu da regionda yeni gərginlik riskini artırar. O vurğulayıb ki, Ermənistan beynəlxalq səviyyədə tanınmış sərhədlər çərçivəsində “real dövlət modeli” üzərində fokuslanmalıdır.
Baş nazir həmçinin “Şərqi Türkiyə” və “dənizdən dənizə Ermənistan” kimi yanaşmaların gələcək üçün real olmadığını bildirib və ölkəsinin yalnız sülh gündəliyi ilə irəliləməli olduğunu qeyd edib.
Qarabağdan köçən ermənilərin vəziyyətinə də toxunan Paşinyan onların Ermənistan cəmiyyətinə inteqrasiyasının vacibliyini vurğulayıb və bu mövzunun humanitar çərçivədə həll edilməli olduğunu deyib.
O əlavə edib ki, yeni konstitusiya Ermənistanın daxili işi olsa da, onun qəbulunun region üçün də mühüm siyasi nəticələri olacaq.
Geri dön