Məhkəmədən Trampa zərbə - 10 milyardlıq iddia rədd edildi
14-04-2026, 10:19. Yazar: vasif
Donald Tramp-ın media nəhəngi The Wall Street Journal-a qarşı qaldırdığı 10 milyard dollarlıq iddia Florida ştatında dairə məhkəməsi tərəfindən rədd edilib. Qərar ABŞ ictimaiyyətində geniş rezonans doğurub.
İddia 2025-ci ildə yayımlanan və Trampın adı ilə bağlı mübahisəli bir materiala əsaslanırdı. Həmin yazıda onun vaxtilə maliyyəçi Ceffri Epşteyn ilə bağlı açıqcaya dair iddialara toxunulmuşdu.
Məhkəmə isə qərarında bildirib ki, şərəf və ləyaqətin pozulduğunu sübut etmək üçün Tramp jurnalistlərin “qəsdən yalan yaydığını” və ya “pis niyyətlə hərəkət etdiyini” göstərməli idi. Lakin bu sübutlar təqdim olunmayıb.
Hakim qeyd edib ki, material hazırlanarkən media qurumu həm Trampın nümayəndələri, həm də ABŞ Ədliyyə Nazirliyi və Federal Təhqiqat Bürosu ilə əlaqə saxlayaraq mövqeləri öyrənməyə çalışıb. Bu isə araşdırmanın jurnalist standartlarına uyğun aparıldığını göstərir.
Bununla belə, məhkəmə Trampa iddianı düzəliş edərək yenidən təqdim etmək imkanı verib. Hüquq komandası isə daha güclü əsaslarla yenidən məhkəməyə müraciət edəcəklərini açıqlayıb. Bu səbəbdən proses tam bağlanmış sayılmır və növbəti mərhələ diqqətlə izlənilir.
aia.az
Tərcümə şöbəsi
Geri dön