Fiqurların savaşı:
7-02-2026, 13:16. Yazar: sevinc1
Prezidentlərdən şahzadələrə, Nobel mükafatçılarından maliyyə nəhənglərinə qədər hər kəsi eyni qaranlıq nöqtədə birləşdirən nə idi? 'Epşteyn məsələsi' artıq sadəcə bir qalmaqal deyil, sistemin özünü yeniləmə əməliyyatıdır. 'Qara zəmanət' mexanizmi necə işləyirdi? Arxivlər niyə indi açılır? Müəllifimiz Şəmsi Qocanın təqdimatında araşdırma yazısının 1-ci hissəsini təqdim edirik:
Qlobal labirintin ifşası və kölgələr teatrı
Dünya tarixi zaman-zaman elə hadisələrlə üzləşir ki, onlar təkcə fərdlərin taleyini deyil, bütöv bir sistemin mahiyyətini bütün çılpaqlığı ilə ortaya qoyur. Müasir dövrün ən qaranlıq və müəmmalı səhifələrindən biri olan "Epşteyn məsələsi" də məhz belə bir hadisədir. İlk baxışda adi bir kriminal xronika, insan alveri və əxlaqi aşınma kimi görünən bu olay, əslində nəhəng bir buz dağının görünən tərəfidir. Pərdə bir az aralandıqda isə qarşımızda mürəkkəb bir "Kölgələr Teatrı" canlanır.
Bu məsələni anlamaq üçün biz sadəcə bir milyarderin cinayətlərinə deyil, qlobal güc mərkəzlərinin illər boyu tətbiq etdiyi qaranlıq idarəetmə metodlarına nəzər salmalıyıq. Ceffri Epşteyn bu böyük şahmat lövhəsində nə ssenari müəllifi, nə də əsas oyunçu idi; o, sadəcə ən mühüm gedişləri icra edən, lakin vaxtı çatanda fəda edilən strateji bir fiqur idi. Onun əsas vəzifəsi dünyanın ən nüfuzlu simalarını — prezidentləri, şahzadələri, elm adamlarını və maliyyə nəhənglərini vahid bir şəbəkədə birləşdirmək və onları "günah birliyi" zənciri ilə sistemə bağlamaq idi.
Bu gün Epşteyn arxivlərinin açılması və bəzi "toxunulmaz" adların ifşası, ABŞ-dan Avropaya qədər uzanan bir təmizlik əməliyyatının başlanğıcıdır. Lakin bu, sadəcə keçmişin hesablaşması deyil, həm də gələcəyin yenidən dizayn edilməsi prosesidir. Bəşəriyyət bu qaranlıq keçmişin toz-dumanı içində boğulmamalı, "keçmiş keçmişdə qaldı" məntiqindən uzaqlaşaraq, daha şəffaf bir dünyanın qurulması üçün bu hadisədən dərs çıxarmalıdır.
Təqdim olunan bu təhlil, nəhəng şəbəkənin anatomiyasını, "qara zəmanət" mexanizmini və sistemin özünü qorumaq üçün atdığı "asta təmizlik" addımlarını bütün detalları ilə araşdırır. Bu yazı sadəcə bir ifşa mətni deyil, həm də mənəvi bir oyanışa və sistemin mahiyyətini anlamağa çağırışdır.
Fiqur və vasitəçi — qapıların arxasındakı qaranlıq Riyaziyyat
Ceffri Epşteynin həyat hekayəsi adi bir karyera yüksəlişindən daha çox, qlobal güc mərkəzləri tərəfindən əvvəlcədən cızılmış və hər bir gedişi hesablanmış qaranlıq bir ssenarinin tətbiqinə bənzəyir. Onun sadə bir müəllimlikdən dünyanın ən mühüm qapılarının açarına çevrilməsi prosesi təsadüflərlə deyil, dəqiq tənzimlənmiş bir "riyaziyyat" üzərində qurulmuşdu. Bu riyaziyyatda rəqəmlər insan ehtirasları, məchullar isə dövlət sirləri idi.
Hər şey Manhettendəki nüfuzlu Dalton məktəbindən başladı. Maraqlıdır ki, Epşteynin nə ali təhsil diplomu, nə də müəllimlik lisenziyası var idi, lakin o, elit ailələrin övladlarına riyaziyyat və fizikadan dərs deyirdi. Onu bu vəzifəyə gətirən şəxs isə sonradan ABŞ-ın baş prokuroru olacaq Uilyam Barrın atası Donald Barr idi. Bu fakt Epşteynin hələ gənc yaşlarından sistemin daxilindəki "müvafiq əllər" tərəfindən himayə edildiyinin ilk ciddi siqnalı idi. Sanki sistem onu laboratoriya şəraitində böyüdərək, gələcəkdə icra edəcəyi daha böyük missiyalara hazırlayırdı.
Müəllimlikdən qısa müddət sonra onun Bear Stearns kimi bir maliyyə nəhənginə transfer olunması isə sanki onun manipulyasiya istedadının daha geniş miqyasda sınaqdan keçirilməsi üçün idi. O, burada rəqəmlərlə yox, insan taleləri və böyük pulların qeyri-rəsmi hərəkəti ilə oynayan bir "maliyyə memarına" çevrildi. Epşteyn üçün bazar sadəcə iqtisadi platforma deyil, zəifliklərin və asılılıqların idarə edildiyi bir birja idi.
Epşteynin "milyarder" imicinin arxasında dayanan əsas maliyyə sütunu isə "Victoria's Secret" brendinin sahibi Lesli Veksner idi. Veksnerin ona öz sərvəti üzərində mütləq nəzarət hüququ verən geniş etibarnamə bağlaması maliyyə tarixində analoqu olmayan bir hadisə idi. Bu, sadəcə bir etibar deyil, Epşteynin arxasında dayanan görünməz güclərə verilmiş iqtisadi mandat idi. Məhz bu "qara kassa" sayəsində Epşteyn Nyu-Yorkun ən dəbdəbəli mülklərinə, şəxsi təyyarələrə və o məşhur adaya sahib oldu.
Lakin o, sadəcə pul idarəçisi deyildi; Epşteyn həm də intellektual nüfuzu satın almağın yollarını bilirdi. "Edge" Fondu vasitəsilə Stiven Hokinq kimi dahi beyinləri öz ətrafına toplayaraq elmi və akademiyanı öz şantaj və təsir şəbəkəsinin bir hissəsinə çevirdi. O, elmi elitaya maliyyə, siyasi elitaya isə "həll yolları" təklif edərək hər iki dünyanı eyni qaranlıq mərkəzdə kəsişdirirdi. O, bir tərəfdən siyasətçiyə lazım olan maliyyəni tapır, digər tərəfdən milyarderə lazım olan siyasi nüfuzu təmin edirdi. Hər iki tərəfə isə öz gizli dünyasında "əyləncə" və qeyri-qanuni imkanlar vəd edirdi.
(Davamı var)
Şəmsi Qoca
Geri dön