Avrozonada dövlət borcu səviyyəsi artıb
Bu gün, 19:42. Yazar: sevinc1
Avro Bölgəsində dövlət borcunun Ümumi Daxili Məhsula (ÜDM) nisbəti ötən ilin üçüncü rübündə 88,5 faizə yüksəlib. Avropa Statistika İdarəsi (Avrostat) Avropa İttifaqı (Aİ) və Avrozonanın 2025-ci ilin üçüncü rübü üçün dövlət borcu və büdcə kəsiri ilə bağlı məlumatları açıqlayıb.
Məlumatlara görə, Avrozonada dövlət borcunun ÜDM-ə nisbəti ikinci rübdəki 88,2 faizdən üçüncü rübdə 88,5 faizə yüksəlib.
Aİ-də dövlət borcunun ÜDM-ə nisbəti də ikinci rübdəki 81,9 faizdən üçüncü rübdə 82,1 faizə yüksəlib.
Beləliklə, bu dövrdə ümumi dövlət borcu Avrozonada 13,855 trilyon avroya, Aİ-də isə 15,253 trilyon avroya çatıb.
Aİ üzvü olan dövlətlər arasında ötən ilin üçüncü rübündə Yunanıstanın dövlət borcunun ÜDM-ə nisbəti 149,7 faizlə ən yüksək olub. Onu 137,8 faizlə İtaliya, 117,7 faizlə Fransa, 107,1 faizlə Belçika və 103,2 faizlə İspaniya izləyir.
Sözügedən dövrdə dövlət borcunun ÜDM-ə nisbəti ən aşağı olan ölkələr 22,9% ilə Estoniya, 27,9% ilə Lüksemburq, 28,4% ilə Bolqarıstan və 29,7% ilə Danimarka olub.
Aİ-də büdcə kəsirinin ÜDM-ə nisbəti ikinci rübdə 2,9%-dən üçüncü rübdə 3,2%-ə yüksəlib.
Avrozonada büdcə kəsirinin ÜDM-ə nisbəti də bu dövrdə 2,8%-dən 3,2%-ə yüksəlib.
Aİ ölkələri arasında üçüncü rübdə ən yüksək büdcə kəsirləri Rumıniyada (7,3%), Polşada (5,8%), Belçikada (5,7%), Fransada (5,4%), Avstriyada (4,8%) və Macarıstanda (4,4%) qeydə alınıb.
Aİ qaydalarına görə, normal şəraitdə üzv dövlətlərin dövlət borcu ÜDM-nin 60%-ni, büdcə kəsirləri isə ÜDM-nin 3%-ni keçməməlidir. Bu limitlər aşıldıqda, tədbirlər Aİ Komissiyasına bildirilməli və təsirli tədbirlər görülməlidir.
aia.az
Tərcümə şöbəsi
Geri dön