Böyük Azərbaycan strategiyası:
14-01-2026, 12:49. Yazar: sevinc1
Müasir dünya siyasi riyakarlığın, ikili standartların və güc mərkəzlərinin amansız toqquşma meydanına çevrilib. Beynəlxalq hüququn işləmədiyi, böyük dövlətlərin yalnız öz maraqlarını diktə etdiyi bir vaxtda Azərbaycan xaosun içindən sıyrılaraq öz müstəqil inkişaf modelini yaratmağı bacardı. Bu çətin, lakin şərəfli yolun memarı, xalqın ən çətin anlarda sığındığı qala və dövlətin sarsılmaz iradəsi Prezident İlham Əliyevdir. Bu gün qazanılan hər bir uğur 1993-cü ildə Heydər Əliyev tərəfindən əsası qoyulan milli dövlətçilik xəttinin məntiqi davamı, milli intibahın parlaq səhifəsidir. Ulu Öndər Azərbaycanı parçalanmaqdan və fiziki yox olmaqdan xilas etdisə, İlham Əliyev bu dövləti regionun liderinə, dünyanın isə hesablaşdığı strateji gücə çevirdi.
Hələ 1994-cü ildə "Əsrin Müqaviləsi" ilə təməli qoyulan iqtisadi müstəqillik illər keçdikcə sadəcə neft gəliri demək deyil, güclü dövlət və rifah içində yaşayan cəmiyyət demək idi. Prezident İlham Əliyev neftdən gələn hər qəpiyi xalqın gələcəyinə, ölkənin modernləşməsinə və ən əsası, ordunun qüdrətlənməsinə yönəltdi. Azərbaycanı təkcə iqtisadi göstəricilərinə görə deyil, həm də mənəvi birliyinə görə sarsılmaz etdi. "Azərbaycançılıq" ideologiyası ölkədə yaşayan hər bir kəsi — dilindən və dinindən asılı olmayaraq vahid bayraq, vahid amal ətrafında polad kimi birləşdirdi. Bu sarsılmaz birlik gələcək böyük qələbələrin mənəvi təməli idi.
Ali Baş Komandan İlham Əliyevin rəhbərliyi ilə Azərbaycan ordusu 21-ci əsrin hərb tarixinə yeni bir imza atdı. Dünyaya sübut olundu ki, ədaləti bərpa etmək üçün təkcə haqlı olmaq yetmir, həm də yumruğu yerinə vurmağı bacaran gücün olmalıdır. Son 20 ildə qurulan "intellekt ordusu" ən müasir texnologiyalar və PUA-larla təchiz edilərək döyüş meydanında dastan yazdı. 44 günlük Vətən müharibəsində qazanılan Zəfər həm də Azərbaycan əsgərinin mənəvi üstünlüyü idi. Prezidentin "Qarabağ Azərbaycandır və nida işarəsi!" kəlamı xalqın və ordunun qələbə şüarına, düşmənin isə məğlubiyyət möhürünə çevrildi. Şuşanın zirvəsində dalğalanan bayraq təkcə torpağın azadlığı deyil, 30 illik yaralı qürurumuzun bərpası, şəhidlərimizin ruhunun hüzur tapması idi.
Azərbaycan bu gün həm də dünyanın enerji təhlükəsizliyini təmin edən strateji mərkəzdir. İlham Əliyevin uzaqgörən enerji diplomatiyası nəticəsində ərsəyə gələn Cənub Qaz Dəhlizi Avropanın enerji xəritəsini kökündən dəyişdi. Bu, sadəcə boru kəməri deyil, Azərbaycanın qlobal siyasətdəki çəkisini artıran, onu əvəzolunmaz tərəfdaşa çevirən bir layihədir. Eyni zamanda, Bakı-Tbilisi-Qars dəmir yolu və müasir liman infrastrukturumuz ölkəmizi qədim İpək Yolunun ən etibarlı qovşağına çevirib. İndi Şərqlə Qərb arasında ən qısa və təhlükəsiz yol məhz bizim torpaqlarımızdan keçir. Zəngəzur dəhlizi isə həm iqtisadi mənfəət, həm də Türk dünyasının coğrafi birliyini təmin edəcək tarixi bir hədəfdir.
Cənab Prezidentin "neft kapitalını insan kapitalına çevirməliyik" hədəfi bu gün öz real bəhrəsini verir. Azərbaycan artıq təkcə resurs ixrac edən ölkə deyil, həm də intellektual brendlər yaradan bir dövlətdir. Dünyanın heyrətlə izlədiyi "ASAN Xidmət" modeli dövlət və vətəndaş arasındakı baryerləri yıxdı, şəffaflığı həyat tərzinə çevirdi. Xaricdə oxuyub vətənə dönən vətənpərvər gənclər bu gün idarəçilikdə, orduda və elmdə yeni standartlar müəyyən edirlər. Azərbaycanın orbitdəki peykləri isə ölkəmizi kosmik dövlətlər sırasına çıxarmaqla İlham Əliyevin uzağa hədəflənmiş strateji zəkasının təzahürüdür.
Bu gün Qarabağ və Şərqi Zəngəzurda tarixin ən böyük quruculuq işləri gedir. Prezident İlham Əliyev hər həftə həmin torpaqlarda yeni təməllər atır, hər bir kəndin, hər bir binanın layihəsini şəxsən izləyir. "Ağıllı kənd" layihələri, qısa müddətdə tikilən beynəlxalq hava limanları Azərbaycanın iqtisadi qüdrətinin və quruculuq əzminin dünyaya nümayişidir. Mədəniyyət paytaxtımız Şuşanın bərpası, "Xarı bülbül" ün sədaları xalqımızın qırılmış mənəvi bağlarını yenidən bərpa etdi. Bu, sadəcə qayıdış deyil, bu, böyük bir millətin öz ruhuna və tarixinə sahib çıxmasıdır.
Azərbaycanın bugünkü sabitliyi və inkişafı cənab Prezident İlham Əliyevin 20 illik fədakar əməyinin, sarsılmaz iradəsinin və xalqına olan sonsuz sevgisinin nəticəsidir. O, hər zaman xalqı ilə dürüst danışdı, xalqı isə ona inandı və arxasında durdu. Bu gün övladlarımız sülh içində böyüyürsə, dövlətimizin adı dünyanın ən mötəbər kürsülərindən qürurla gəlirsə, bunun tək ünvanı Prezident İlham Əliyevdir. O, təkcə bu günün qalibi deyil, Azərbaycanın əbədi və işıqlı gələcəyinin ən böyük təminatçısıdır!
Şəmsi Qoca
Geri dön