Almaniyanın əmək bazarı 2010-cu ildən bəri ən pis dekabr ayı göstəriciləri...
7-01-2026, 20:13. Yazar: sevinc1
Almaniyada zəif iqtisadiyyat və qış tətilləri səbəbindən 2025-ci ilin dekabr ayında işsizlərin sayı əvvəlki aya nisbətən 23.000 nəfər artıb və nəticədə əmək bazarında 2010-cu ildən bəri ən pis dekabr ayı göstəriciləri müşahidə olunub
Almaniya Federal Məşğulluq Agentliyi (BA) 2025-ci ilin dekabr ayı üçün işsizlik rəqəmlərini açıqlayıb.
Bu rəqəmlərə görə, ölkədə düzəliş edilməmiş işsizlərin sayı dekabr ayında noyabr ayı ilə müqayisədə 23.000 artaraq 2.908.000 nəfərə çatıb.
Bu artım əmək bazarının zəifləməsi, çətinlik çəkən iqtisadiyyat və Milad və Yeni il öncəsi qış tətilləri ilə əlaqələndirilir.Ölkədə mövsümi olaraq tənzimlənmiş işsizlik səviyyəsi də dekabr ayında noyabr ayı ilə müqayisədə 3000 nəfər artaraq 2,9 milyona çatıb. Bazarın dekabr ayında işsizlik səviyyəsi ilə bağlı gözləntiləri 5000 nəfər artım idi.
Düzəlişsiz işsizlik səviyyəsi dekabr ayında 0,1 faiz bəndi artaraq 6,2 faizə çatıb. Dekabr ayında şirkətlər tərəfindən tutulan boş iş yerlərinin sayı ötən ilin eyni ayı ilə müqayisədə 35000 nəfər azalaraq 619000-ə çatıb.
ING şirkətinin Qlobal Makro Tədqiqatları şöbəsinin rəhbəri və Almaniya üzrə baş iqtisadçısı Karsten Brzeski təhlilində Almaniya əmək bazarının 2010-cu ildən bəri ən pis dekabr ayı göstəricilərini qeydə aldığını bildirib.
Almaniya əmək bazarının pisləşməyə davam etdiyini iddia edən Brzeski deyib: "Almaniyada işsizlik 23.000 nəfər artaraq 2.908.000 nəfərə çatıb və 2010-cu ildən bəri dekabr ayının ən yüksək səviyyəsinə çatıb".
Brzeski qeyd edib ki, Almaniyada işsizlərin sayı son dörd ildə təxminən 500.000 nəfər artıb və əlavə edib: "Bu tədricən pisləşmə dərslik iqtisadi nəzəriyyəsini əks etdirir; iqtisadiyyat beş ildən çoxdur ki, faktiki olaraq durğunluq vəziyyətindədir və sənaye ciddi struktur çətinlikləri ilə üzləşdiyindən əmək bazarındakı pisləşmə qaçılmaz idi".
Karsten Brzeski bildirib ki, Almaniya əmək bazarındakı tədricən pisləşmə davam edəcək və bu, 2026-cı ildə özəl istehlakın bərpasını daha da çətinləşdirəcək.
aia.az
Tərcümə şöbəsi
Geri dön