General Horta N'Tam Qvineya-Bisau prezidenti vəzifəsinin icrasına başlayıb
Bu gün, 21:01. Yazar: sevinc1
Dünən Qvineya-Bisauda hərbi qüvvələrin hakimiyyəti ələ keçirməsindən sonra general Horta N'Tam "keçid dövrü prezidenti" kimi and içib.Qvineya-Bisau Dövlət Televiziyası (TGB) general N'Tamin Baş Qərargahda keçirilən rəsmi mərasimdə ölkənin yeni prezidenti kimi and içdiyini elan etdi.
N'Tam bir il davam etməsi planlaşdırılan keçid dövrünə rəhbərlik edəcək.
Təxminən 2,1 milyon əhalisi olan Qvineya-Bisauda özlərini "Aidətin Bərpası üzrə Ali Hərbi Komandanlıq" adlandıran bir qrup əsgər dünən dövlət televiziyasında hakimiyyəti ələ keçirdiklərini elan etdilər.
Qrup qərarlarının əsaslandırılması kimi bəzi siyasətçilərin və tanınmış narkotik lordunun ölkədəki sabitliyi pozmaq cəhdlərini göstərdi.Bu arada, Prezident Umaro Sissoco Embalonun bu dövrdə xarici mətbuata mobil telefon vasitəsilə verdiyi açıqlamalar diqqəti cəlb etdi.
Fransada yerləşən Afrika nəşri olan Jeune Afrique, Embalonun ofisində həbs olunduğunu və Embalo ilə telefon danışığı zamanı vəziyyətinin yaxşı olduğunu iddia edən bir xəbər yayımladı.
Daha sonra Fransa televiziya kanalı France 24, telefonla əlaqə saxlayan Embalonun "Məni hərbi çevrilişlə devirdilər. Çox məlumat verə bilmərəm, yoxsa telefonumu əlimdən alacaqlar. Hazırda Baş Qərargahdayam" dediyini bildirdi.
Bəzi xarici jurnalistlər sosial mediada bu səhər danışdıqlarını və Embalonun gecəni Baş Qərargahda keçirdiyini söylədiyini paylaşdılar.
İki namizədin qələbə elan etməsi çevrilişə səbəb oldu.
23 noyabrda Qvineya-Bisauda keçirilən parlament və prezident seçkilərində, rəsmi nəticələr açıqlanmadan əvvəl komandası tərəfindən aparılan hesablamaya görə, Embalo səslərin 65 faizini aldığını iddia etdi.
Embalonun ən güclü rəqibi, müstəqil namizəd Fernando Dias da Kosta da seçkilərdə qalib gəldiyini iddia etdi.
Umaro Sissoko Embalo əsas müxalifət lideri Dominqos Simoes Pereira-nın namizədliyinə mane olmaqda ittiham olunurdu.
Ölkənin ən görkəmli siyasi partiyalarından biri olan Qvineya və Kabo-Verde Afrika Müstəqillik Partiyasının (PAIGC) lideri Pereira namizəd siyahısında yer tuta bilmədikdən sonra Dias da Kostanı dəstəklədiyini bəyan etdi.
Seçki nəticələrinin bu gün açıqlanması planlaşdırılırdı.
aia.az
Tərcümə şöbəsi
Geri dön