Maduro: "Nə etsələr də, Venesuelanı ələ keçirə bilməyəcəklər"
25-11-2025, 20:41. Yazar: sevinc1
Venesuela prezidenti Nikolas Maduro ABŞ-ın ölkəsinə mümkün müdaxiləsi ilə bağlı deyib: "Nə etsələr etsinlər, necə etsələr etsinlər, Venesuelanı ələ keçirə bilməyəcəklər".
Xüsusi televiziya proqramında cari hadisələrlə bağlı açıqlama verən Maduro, ABŞ-ın Karib dənizi bölgəsindəki genişmiqyaslı hərbi fəaliyyətini qiymətləndirdi.
Maduro, ölkəsinə qarşı potensial ABŞ hərbi hücumunu vurğulayaraq dedi: "Venesuelanı cəsarətlə dəstəkləyən hər kəsə minnətdarıq. Aylardır məruz qaldığımız psixoloji və siyasi müharibəyə baxmayaraq, təsvir edilə bilməyən dəstək mesajları aldıq. Nə etsələr də, necə etsələr də, Venesuelanı ələ keçirə bilməyəcəklər."
ABŞ-ın çoxşaxəli hücumuna məruz qaldıqlarını vurğulayan Maduro dedi: "Onlar Venesuelanı məğlub edə bilməyəcəklər. Biz məğlubedilməzik. Əvvəllər uğursuz olduqları kimi, bir daha heç vaxt uğur qazana bilməyəcəklər."
Venesuelanın ona dəstəyinin 70 faizə çatdığını qeyd edən Maduro dedi: "ABŞ-ın hərbi təhdidi qəbul edilmir və sağçıların işğal çağırışları rədd edilir."
"Biz özünü təmin edən istehsal gücü qururuq."
Maduro bildirdi ki, Venesuela son illərdə neftdən asılılığını azaldıb, iqtisadiyyatı gücləndirmək üçün nəzərdə tutulmuş 13 strateji sektorda istehsalı artırıb və ölkəni daha yüksək ixrac qabiliyyətinə malik bir iqtisadiyyata çevirməyi hədəfləyib.
Maduro, ölkədə təhlükəsizliyin ən yüksək səviyyədə qorunduğunu bildirərək, "Biz özünü təmin edən istehsal gücü yaradırıq. Bununla daxili bazarı qidalandıracaq və özəl sektora və yerli icmaların iqtisadiyyatına güvənəcəyik. Təhlükəsizlik bizim prioritetimizdir və xalq təhlükəsizliyin ən böyük qarantıdır. Təvazökarlıq bizi böyük edəcək və xalqımız həqiqətlərini müdafiə etmək yolunda irəliləyir" dedi.
ABŞ dünən Maduro və Venesuelalı yüksək vəzifəli rəsmilərin rəhbərlik etdiyini iddia etdiyi Cartel de los Soles cinayətkar təşkilatını Xarici Terror Təşkilatları (XTT) siyahısına daxil etdi.
Venesuela ABŞ-ın bu addımını ölkəyə müdaxilə üçün bəhanə yaratmaq cəhdi kimi xarakterizə etdi.
ABŞ tərəfindən "narkotik qaçaqmalçılığı ilə mübarizə" üçün göndərilən dünyanın ən böyük təyyarədaşıyan gəmisi olan USS Gerald R. Ford və onun hücum qruplaşmasının Latın Amerikası bölgəsinə çatdığı bildirildi.
Venesuela Prezidenti Maduro cavab olaraq ölkədə 4,5 milyon milis qüvvəsini səfərbər etdiyini və istənilən hücumu dəf etməyə hazır olduğunu açıqladı.
aia.az
Tərcümə şöbəsi
Geri dön