Kəlbəcər haqqın, ədalətin bərpasının simvoludur
Bu gün, 10:59. Yazar: azer
Azərbaycan tarixində dərin iz buraxan günlər arasında 25 noyabr xüsusi yer tutur. Bu gün Kəlbəcər rayonunun işğaldan azad olunması və tarixi ədalətin bərpası günü kimi qeyd olunur. Azərbaycanın dövlətçilik salnaməsində mühüm hadisələrdən biri olan Kəlbəcərin azadlığı həm siyasi, həm də strateji baxımdan ölkəmizin gücünü və qətiyyətini nümayiş etdirən dönüş nöqtəsi olmuşdur.
Kəlbəcər Azərbaycanın ən qədim yaşayış məskənlərindən biri olmaqla, tarixən mühüm mədəniyyət mərkəzlərindən biri kimi formalaşmışdır. Təbii sərvətlərlə zəngin olan bu bölgə əsasən dağlıq relyefi, mineral su ehtiyatları, yaylaqları, qədim abidələri və unikal təbiəti ilə seçilir. İstisu kimi məşhur kurort əraziləri, IX–XIII əsrlərə aid alban kilsələri, Qanlıqaya petroqlifləri və digər tarixi irs nümunələri uzun illər ərzində Azərbaycanın mədəni mənzərəsində xüsusi yer tutmuşdur.
Rayonun coğrafi mövqeyi də strateji əhəmiyyət daşıyırdı. Kəlbəcər həm Qarabağla, həm də Şərqi Zəngəzur bölgəsi ilə bağlı kommunikasiya əlaqələrinin mühüm həlqəsi olmuşdur. Bu əraziyə nəzarət regionun təhlükəsizliyinə və nəqliyyat-logistika imkanlarına birbaşa təsir göstərirdi.
1993-cü ildə Ermənistan tərəfindən işğal nəticəsində Kəlbəcər rayonunun bütün ərazisi viran edilmiş, yüzlərlə şəhər və kənd dağıdılmış, mədəni irs abidələri məhv edilmişdir. Minlərlə sakin öz ata-baba yurdlarından didərgin düşmüş, bölgənin bütün infrastruktur sistemi sıradan çıxarılmışdı. İşğal illəri Kəlbəcərin tarixində ən ağır dövrlərdən biri olmuşdur.
Bu dövrdə rayonun təbii sərvətləri talan edilmiş, unikal abidələrə ziyan vurulmuş, qışlaq-yaylaq sistemləri məhv edilmişdir. Ermənistan işğalı nəticəsində yalnız Kəlbəcərin deyil, bütövlükdə regionun sosial-iqtisadi inkişafı ciddi zərbə almışdı.
2020-ci il Vətən müharibəsində Azərbaycan Ordusunun parlaq Zəfəri nəticəsində Ermənistan kapitulyasiya etməyə məcbur olmuş, imzalanmış 10 noyabr Bəyanatına əsasən Kəlbəcər rayonu 25 noyabr 2020-ci ildə Azərbaycana qaytarılmışdır. Bu hadisə təkcə hərbi-siyasi üstünlüklə deyil, həm də dövlətimizin qətiyyətinin təntənəsi kimi tarixə düşdü.
Kəlbəcərə bir güllə atmadan qayıdılması həm Azərbaycan diplomatiyasının, həm də ordusunun qüdrətinin göstəricisi idi. 25 noyabr tarixinin “Kəlbəcər şəhər günü” kimi qeyd edilməsi isə bu mühüm hadisənin əbədiləşdirilməsi baxımından mühüm tarixi addımdır.
Kəlbəcərin azad olunmasından sonra bölgədə genişmiqyaslı bərpa və quruculuq işləri həyata keçirilir. Şəhərin və kəndlərin bərpası üçün müasir planlaşdırma prinsiplərinə əsaslanan layihələr hazırlanmışdır. Yol infrastrukturunun yenilənməsi, tunel və körpülərin tikilməsi, enerji təminatının tam bərpası, “ağıllı kənd” və “yaşıl enerji” layihələrinin icrası Kəlbəcərin gələcəyini regionun prioritet inkişaf zonasına çevirir.
Kəlbəcərin təbii və turistik potensialı onun yaxın illərdə Azərbaycanın ən mühüm rekreasiya və iqtisadi mərkəzlərindən birinə çevriləcəyini göstərir. İstisu termal mərkəzinin yenidən qurulması, ekoturizmin inkişafı, kənd təsərrüfatı və heyvandarlığın modernləşdirilməsi rayonun iqtisadi dinamizmini təmin edəcək əsas istiqamətlərdir.
25 noyabr Kəlbəcər Şəhər Günü təkcə bir tarixi hadisənin qeyd olunması deyil, həm də milli qürur və dirçəlişin rəmzidir. Bu gün Kəlbəcər sakinlərinin uzun illər həsrətində olduqları yurdlarına qayıdışın, Azərbaycan dövlətinin gücünün və xalqımızın birliyinin təntənəsini ifadə edir. Kəlbəcərin yenidən qurulması və dirçəldilməsi isə çağdaş Azərbaycanın qarşısında duran ən şərəfli və strateji vəzifələrdən biri olaraq davam edir.
Əminə Ağazadə
Milli Məclisin deputati
Geri dön