Xilasdan Zəfərə: Azərbaycanın Liderlik Dastanı
Bu gün, 15:11. Yazar: azer
Azərbaycanın müstəqillik tarixi heç də hamar olmayıb; bu, xalqın öz varlığını və dövlətçiliyini qorumaq üçün apardığı çətin və bəzən qanla yazılmış mübarizənin yoludur. Xilas və dövlət quruculuğu mərhələlərindən sonra ölkə inkişaf və zəfər dövrünə qədəm qoydu. Bu yol tarixin taleyüklü anlarında xalqın iradəsi ilə böyük rəhbərlərin qətiyyətinin birləşməsindən yaranmış əzmkarlıq salnaməsidir. Məhz iki böyük liderin uzaqgörən siyasəti bu yolun uğurla tamamlanmasını təmin etdi.1993-cü ildə Heydər Əliyevin Bakıya qayıdışı adi siyasi proses deyildi – bu, xalqın ümidinə cavab, dövlət iradəsi ilə xalqın iradəsinin mükəmməl birliyinin təcəssümü idi. Ulu Öndər ölkəni qısa müddətdə anarxiya və separatizm təhlükəsindən çıxararaq hüquqi dövlətin möhkəm bünövrəsini qoydu. Milli Konstitusiyanın qəbul edilməsi ilə qanunun aliliyi təsbit olundu, dövlət idarəçiliyi və intizamı bərpa edildi. “Əsrin müqaviləsi” imzalanaraq iqtisadi müstəqilliyin əsas dayaqları yaradıldı və gələcək inkişaf üçün etibarlı maliyyə zəmini formalaşdırıldı. Onun prinsipial mövqeyi korrupsiya və mütəşəkkil cinayətkarlığa qarşı sərt mübarizəyə gətirdi, ölkədə ictimai-siyasi sabitlik təmin edildi, xalqın itirdiyi əminlik və gələcəyə inam hissi bərpa olundu. Azərbaycan məhz bu sarsılmaz sabitlik üzərində dirçəldi və Heydər Əliyev azərbaycançılıq ideologiyası ilə milli ruhu canlandıraraq xalqı ortaq məqsəd ətrafında birləşdirdi.Prezident İlham Əliyev atasının qurduğu sabitliyi qoruyaraq onu keyfiyyətcə yeni mərhələyə daşıdı.Ulu Öndər Heydər Əliyevin müəyyənləşdirdiyi xətti davam etdirərək Azərbaycanı regionda modernləşmə, inkişaf və nüfuz mərkəzinə çevirdi. Onun rəhbərliyi ilə ölkə regional enerji gücünə və Avrasiyanın mühüm nəqliyyat habına çevrildi. Cənub Qaz Dəhlizi kimi nəhəng beynəlxalq layihələr Azərbaycanın iqtisadi mövqeyini gücləndirdi. Bununla yanaşı, iqtisadi şaxələndirmə siyasəti neft gəlirlərindən asılılığı azaltdı, qeyri-neft sektoru gücləndirildi. Bu, sadəcə iqtisadi islahatlar deyil, rəqabətədavamlı, müasir və vətəndaş cəmiyyətinə əsaslanan Azərbaycanın qurulması formuluna çevrildi. Cənab Prezident İlham Əliyevin rəhbərliyi ilə aparılan məhkəmə-hüquq və institusional islahatlar dövlətin demokratik inkişaf yolunu möhkəmləndirdi və ölkənin beynəlxalq nüfuzunu artırdı. Amma bütün bu proseslərin ali məqsədi – işğala son qoymaq idi.İki liderin ardıcıl və strateji fəaliyyəti milli iradənin iki dayağını – xilas və inkişafı – yaratdı və bu konsepsiya 2020-ci ilin qürur dolu günlərində Tarixi Zəfərlə tamamlandı. Ulu Öndər Heydər Əliyevin qurduğu ordu və Cənab Prezident İlham Əliyevin formalaşdırdığı iqtisadi güc milli iradəni Zəfərə aparan qanadlara çevrildi. Azərbaycan bu gün bütün çətinlikləri dəf edərək, öz iradəsinin dönməzliyini və dövlətçilik ənənəsinin sarsılmazlığını bütün dünyaya nümayiş etdirir.
Rövşən Qasımov,
YAP Gədəbəy rayon təşkilatının məsləhətçisi.
Geri dön