27 Sentyabr – Anım Günü
Bu gün, 12:59. Yazar: azer
Azərbaycan xalqının tarixi yaddaşında əbədi olaraq iz qoymuş günlərdən biri 27 sentyabrdır. 2020-ci ilin məhz bu tarixində Ermənistan silahlı qüvvələrinin ölkəmizə qarşı növbəti genişmiqyaslı təxribatlarına cavab olaraq Azərbaycan Ordusu əks-hücum əməliyyatlarına başlamışdır. Bu əməliyyatlar xalqımızın iradəsi, birliyi və ordumuzun qüdrəti sayəsində 44 gün davam etmiş və Azərbaycan dövlətinin möhtəşəm Zəfəri ilə başa çatmışdır.
27 sentyabrda başlanan və 8 noyabr 2020-ci ildə başa çatan Vətən müharibəsi Azərbaycanın tarixində dönüş nöqtəsi oldu. Bu müharibə nəticəsində illərlə işğal altında qalmış torpaqlarımız azad edildi, ərazi bütövlüyümüz təmin olundu, xalqımızın milli qüruru və birliyi ən yüksək səviyyədə təzahür etdi.
44 gün davam edən müharibə, əslində, təkcə hərbi əməliyyat deyil, həm də Azərbaycanın güclü dövlət iradəsinin, xalq-ordu birliyinin və beynəlxalq hüququn bərpasının nümunəsi idi.
Vətən müharibəsində qəhrəman oğullarımız şəhidlik zirvəsinə ucaldı. Onların hər biri öz canını Vətənin azadlığı, dövlətimizin suverenliyi və xalqımızın gələcəyi uğrunda fəda etdi. Şəhidlərimizin adı Azərbaycan tarixində əbədi olaraq qızıl hərflərlə yazılmışdır. Onların qəhrəmanlığı gələcək nəsillər üçün vətənpərvərlik məktəbidir.
Azərbaycan dövləti şəhidlərin əziz xatirəsini daim uca tutur, onların ailələrinə və müharibə iştirakçılarına xüsusi diqqət və qayğı göstərir. Bu, həm dövlətimizin, həm də xalqımızın şəhidlərə olan borcunun və minnətdarlığının ifadəsidir.
Azərbaycan Respublikasının Prezidenti, Ali Baş Komandan cənab İlham Əliyevin 2 dekabr 2020-ci il tarixli sərəncamı ilə 27 sentyabr tarixi Anım Günü elan edilmişdir. Bu qərar, hər şeydən əvvəl, şəhidlərimizin ruhuna ehtiramın, Azərbaycan xalqının tarixə olan bağlılığının və milli yaddaşın qorunmasının bariz nümunəsidir.
Hər il 27 sentyabrda ölkənin bütün bölgələrində anım mərasimləri keçirilir, şəhidlərin xatirəsi yad olunur, dövlət qurumlarında, təhsil müəssisələrində və ictimaiyyət arasında vətənpərvərlik ruhunu gücləndirən tədbirlər təşkil olunur. Bu gün həm də gənc nəsillərə milli dəyərlərin, dövlətçilik ideallarının aşılanması baxımından mühüm əhəmiyyət daşıyır.
27 sentyabr – Anım Günü təkcə hüzn günü deyil, həm də xalqımızın birliyi, qətiyyəti və mübarizə əzminin simvoludur. Bu gün biz həm şəhidlərimizin əziz xatirəsini yad edir, həm də müstəqil Azərbaycanın dövlətçilik yolunda daha da güclənməsi üçün birliyimizin vacibliyini bir daha dərk edirik.
Azərbaycan xalqı 2020-ci ilin 27 sentyabr tarixindən başlayan Vətən müharibəsində göstərdi ki, azadlıq və torpaq uğrunda heç bir güc qarşısında geri çəkilməz. Bu mübarizə həm hərb meydanında, həm də diplomatiya sahəsində öz bəhrəsini verdi və tarixi Zəfərlə nəticələndi.
Azərbaycan xalqı və dövləti daim şəhidlərimizin yolunu davam etdirəcək, onların arzularını reallaşdıraraq güclü, müstəqil və ərazi bütövlüyü tam təmin olunmuş bir ölkəni gələcək nəsillərə miras qoyacaqdır.
Hüseyn Sadıqov
YAP Cəbrayıl şəhər ƏPT-nin sədr müavini
Geri dön