Suverenliyin bərpası sarsılmaz iradənin təntənəsidir
Bu gün, 14:56. Yazar: azer
Otuz il... Bir nəsli ömür boyu gözləməyə məhkum edən, yurd həsrətini ürəklərə yandırıcı bir od kimi salan, şəhidlərin qanı ilə yoğrulmuş, hər daşında, hər torpağında zülmün izləri olan bu müddət, nəhayət, sona çatdı. Qarabağ, Azərbaycanın ən yaralı, ən ağrılı yeri, uzun illər ərzində beynəlxalq hüququn mənasız sözlərə çevrildiyi bir coğrafiya parçası idi. BMT-nin məşhur qətnamələri, Minsk qrupu kimi vasitəçilik missiyaları sadəcə bir illüziya, vaxt uzatmaq üçün qurulmuş bir teatr tamaşası idi. Bütün dünyanın gözü qarşısında Azərbaycan torpaqları zəbt edilmiş, mədəni irsimiz məhv edilmişdi, lakin haqqın səsi boğulurdu.
Bu qaranlıq zülmətə son qoymaq üçün bir işıq şüası lazım idi. Və bu işıq Ulu Öndər Heydər Əliyevin müdrik, uzaqgörən siyasətindən qidalanan sarsılmaz dövlət iradəsi idi. O, 1993-cü ildə hakimiyyətə qayıdaraq Azərbaycanı xaosa sürükləyən təlatümlərdən xilas etdi və “torpaqlarımızın azad edilməsi” ideyasını milli hədəfə çevirdi. Məhz bu ideyanın, bu milli amansız qətiyyətin davamçısı Müzəffər Ali Baş Komandan İlham Əliyev oldu. O, Prezident kimi fəaliyyətə başladığı ilk gündən neft gəlirlərini xalqın rifahına, daha da önəmlisi, Ordu quruculuğuna yönəltdi. Bu, bir gün gələcək zəfərin təməli idi.
44 günlük Vətən müharibəsi Azərbaycanın şanlı tarixinə yazılan ən böyük qəhrəmanlıq dastanı oldu. Dəmir Yumruq əməliyyatı sadəcə düşmənin hərbi qüvvəsini yox, həm də işğal siyasətini darmadağın etdi. Lakin bu hekayə hələ bitməmişdi. 2023-cü ilin 19-20 sentyabr günləri Azərbaycanın suverenliyinin tam və qeyd-şərtsiz bərpası üçün son nöqtəni qoydu. Cəmi 23 saatdan bir qədər çox davam edən lokal dövlət suverenliyinin tam bərpası tədbirləri Azərbaycanın öz sərhədlərini qorumaqdakı qətiyyətinin ən parlaq nümunəsi oldu. Bu əməliyyat nəticəsində bölgədəki bütün qanunsuz hərbi birləşmələr silahsızlaşdırıldı, onların mövqeləri və sursat anbarları məhv edildi. Prezident İlham Əliyevin ifadə etdiyi kimi, bu hərəkat nəticəsində beynəlxalq hüquq bərqərar edildi, separatizm və illər boyu davam edən cəzasızlıq sindromu sona çatdı. Bu ədalət yürüşünün ən mühüm nəticələrindən biri də illər boyu xalqımıza qarşı saysız-hesabsız cinayətlər törədən separatçı quldurbaşıların həbs edilərək Bakıya gətirilməsi oldu. Onlar öz cinayətlərinə görə Azərbaycan ədliyyəsi qarşısında cavab verirlər.
Bu gün Qarabağda yeni bir dövr başlayır. Artıq dağılmış şəhərlərin yerində yeni evlər, məktəblər, yollar tikilir. Həyat yenidən canlanır, məcburi köçkünlər öz ata yurdlarına qayıdırlar. Azərbaycanın bu zəfər yürüşü, öz gücünə, öz haqqına inanan bir xalqın qəhrəmanlığının təntənəsidir. Qarabağ bizimdir! Qarabağ Azərbaycandır! Bu şüar bu gün bir daha sübuta yetirilən əbədi həqiqətə çevrildi. Bu, sadəcə bərpa işləri deyil, həm də illər boyu davam edən həsrətin sonu, tarixi ədalətin bərpasıdır. Və bu həqiqət gələcək nəsillərə böyük bir miras qoyur: azadlıq uğrunda mübarizə ruhu, vətən sevgisi və sarsılmaz qürur.
İlqar Kərimov,
YAP Tovuz Rayon Təşkilatının sədr müavini
Geri dön