Naxçıvandan başlanan müstəqillik yolu
Bu gün, 14:19. Yazar: azer
“Ulu Öndər Heydər Əliyevin Naxçıvan Muxtar Respublikasına rəhbərlik etdiyi 1991-1993-cü illər tamamilə haqlı olaraq Ümummilli Liderimizin böyük siyasətə qayıdış dövrü kimi xarakterizə olunur. Məhz bu illər Ulu Öndərin siyasi fəaliyyətində mühüm yer tutur. Bu dövrün başlanğıc nöqtəsi isə 1990-cı ilin 17 noyabr tarixinə təsadüf edir. Həmin gün Naxçıvan parlamentinin yeni tərkibdə keçirilən ilk sessiyası deputatların istəyi və böyük təkidi nəticəsində Ulu Öndər Heydər Əliyevin sədrliyi ilə öz işinə başlamışdı. Milli dövlətçiliyə yeni nəfəs vermiş Naxçıvan parlamentinin ilk sessiyasında gündəliyə çıxarılan məsələlər və qəbul edilən tarixi qərarlar, ümumilikdə, Azərbaycanın müstəqilliyinə və suverenliyinə hesablanmışdı.”
Bu sözləri aia.az-a açıqlamasında Milli Məclisin deputatı Səttar Mövbalıyev deyib.
Fikirlərini davam etdirən millət vəkili Azərbaycanı müstəqilliyə aparan yolda atılan mühüm addımlardan birinin Cümhuriyyət bayrağının Naxçıvan Muxtar Respublikasının Dövlət bayrağı olaraq təsdiq edilməsi olduğunu vurğulayıb: “Azərbaycan Xalq Cümhuriyyətinin üçrəngli Dövlət bayrağı Naxçıvan Muxtar Respublikası Ali Məclisinin 1990-cı il noyabrın 17-də keçirilən sessiyasında Ümummilli Lider Heydər Əliyevin təşəbbüsü Naxçıvan Muxtar Respublikasının Dövlət bayrağı olaraq təsdiq edilmişdi. Bundan sonra Naxçıvan Muxtar Respublikasının Ali Məclisi Azərbaycan SSR Ali Soveti qarşısında üçrəngli bayrağın Azərbaycanın rəsmi dövlət rəmzi kimi tanınması haqqında vəsatət qaldırmışdır. 1991-ci il fevral ayının 5-də həmin vəsatətə baxılmış və Azərbaycan Respublikasının Ali Soveti “Azərbaycan Respublikasının Dövlət bayrağı haqqında” Qanun qəbul edərək onu yenidən Dövlət bayrağı elan etmişdir.”
Daha sonra S.Möhbalıyev Ümummilli Lider Heydər Əliyevin Naxçıvan Ali Məclisinin sədri seçilməsi ilə nəticələnən hadisələrdən bəhs edib: “1991-ci il sentyabrın 3-də Naxçıvan Muxtar Respublikası Ali Məclisində keçirilən fövqəladə sessiyada deputatların və iclas zalının qarşısına toplaşan minlərlə insanın təkidi ilə Ulu Öndərin Ali Məclisin sədri seçilməsi Azərbaycanın müstəqillik yollunun əsasını qoydu. Müasir müstəqil Azərbaycan dövlətinin memarı və qurucusu, milli həmrəylik və bütövlüyü təmin edən azərbaycançılıq ideologiyasının banisi, xalqımızın və dövlətimizin xilaskarı, Ümummilli Lider Heydər Əliyevin Azərbaycan xalqı və dövləti qarşısındakı tarixi xidmətləri misilsizdir. O cümlədən müharibənin davam etdiyi, sənaye məhsullarının çatışmadığı, elektrik enerjisinin olmadığı, sosial-iqtisadi durumun kəskin olduğu bir şəraitdə Ali Məclisin sədri seçilən Ulu Öndər Heydər Əliyev həyata keçirdiyi islahatlar, gördüyü tədbirlər və işlər sayəsində Naxçıvanda sabitliyin, tərəqqinin və həmrəyliyin təmin olunmasına nail oldu. Həmin dövrdə blokada şəraitində yaşayan Naxçıvan bir çox çətinliklərlə üz-üzə qalmışdı. Muxtar Respublikanın sosial-iqtisadi durumunun bərbadlığı, hakimiyyətin muxtar qurum üzərində oynamağa çalışdığı oyunlar bu qədim diyarın vəziyyətini olduqca mürəkkəbləşdirmişdi. Yalnız Ümummilli Lider Heydər Əliyevin gərgin fəaliyyəti və səyləri sayəsində bütün bu çətinlik və təhlükələri dəf etmək mümkün oldu.”
Sonda deputat Ulu Öndərin Azərbycan xalqı və dövləti qarşısında xidmətlərinin müstəsna əhəmiyyət kəsb etdiyini bir daha diqqət mərkəzinə çəkib: “Ümummilli Lider Heydər Əliyevin həm SSRİ dönəmində, həm də müstəqillik illərində ölkəmizə rəhbərliyi dövründə xalqın rifah halının daha da yaxşılaşdırılması, respublikamızın tərəqqisinin təmin olunması və digər istiqamətlərdə tarixi əhəmiyyətə malik olan misilsiz işlər görülüb. Əlbəttə ki, yeni ictimai-siyasi münasibətlərin formalaşdırılması dövründə dövlətçilik ənənələrinin qorunması məsələsi də bilavasitə Ulu Öndər Heydər Əliyevin adı ilə bağlıdır. Ulu Öndərin xalqımız qarşısındakı ən böyük xidmətlərindən biri də məhz Azərbaycan dövlətçiliyinin xilası və bunun sayəsində ölkənin siyasi tarixində yeni bir mərhələnin açılmasıdır” – deyə, Səttar Möhbalıyev fikirlərini tamamlayıb.
Geri dön