Qaz, işıq və su təchizatında problemlər varmı?
17-02-2017, 11:03. Yazar: admin
Dünəndən başlayaraq ölkə ərazisində şaxtalı və qarlı hava şəraiti müşahidə olunur.
AzVision.az müvafiq dövlət qurumlarından qarlı hava şəraitinin kommunal xidmətələrə təsir edib-etmədiyini soruşub.
"Azərişıq" Açıq Səhmdar Cəmiyyətinin mətbuat xidmətinin rəhbəri Tanrıverdi Mustafayev bildirib ki, ölkədə qarlı, şaxtalı hava şəraiti ilə əlaqədar ötən günlərlə müqayisədə elektrik enerjisinə təlabat artıb. “Nə qədər təlabat varsa, əhali elektrik enerjisi ilə fasiləsiz təmin olunacaq. Gün ərzində elektrik enerjisinin verilməsində problem yaranmayıb. Əgər problem olarsa, 199 saylı Çağrı Mərkəzinə telefon açsınlar və operativ şəkildə problem aradan qaldırılacaq”.
“Azəriqaz” İstehsalat Birliyinin İctimaiyyətlə əlaqələr şöbəsinin rəisi İbrahim Kərbəlayev bildirib ki, hava şəraiti ilə əlaqədar planlı işlər təxirə salınıb. Onun sözlərinə görə, respublikada, eləcə də paytaxtda müşahidə olunan qarlı və şaxtalı hava şəraiti ilə əlaqədar fevralın 17-də Abşeron rayonunda, Bakının Binəqədi, Nizami, Nəsimi, Yasamal və Xəzər rayonlarının qaz şəbəkəsində nəzərdə tutulmuş təmir işləri təxirə salınıb.
“Ötən günlərlə müqayisədə əhalinin 1 milyon 446 min kub metr qaza təlabatı artıb. Bu dəqiqəyə qədər qazla bağlı kütləvi müraciət daxil olmayıb. Hansı ərazilədə çatışmamazlıq yaşanıbsa, əməkdaşlarımız həmin yerlərdə tənzimləmə işləri aparıblar”.
“Azərsu” ASC-nin İctimaiyyətlə əlaqələr və mətbuat xidmətinin rəhbəri Anar Cəbrayıllının sözlərinə görə, qurumun mərkəzləşdirilmiş və paylayıcı şəbəkələrində heç bir donma halı qeydə alınmayıb.
“Gücləndirilmiş iş rejimində fəaliyyət göstəririk. Bakı, Abşeron, həmçinin regionlarda vəziyyət stabildir. Əhalinin su ilə təmin edilməsi davam etdirilir. Su təchizatında heç bir problem yoxdur. İndiyədək quruma şikayət daxil olmayıb”.
AİA.az
Geri dön