Yeni dünya düzəni və Azərbaycan: qlobal çağırışlar fonunda strateji prioritetlər və regional liderlik missiyası
Bu gün, 13:25. Yazar: azer
Prezident İlham Əliyevin “Əl-Ərəbiyyə” telekanalına verdiyi müsahibədə səsləndirdiyi fikirlər beynəlxalq ictimaiyyətin diqqətini cəlb edib. Dövlətimizin başçısı Azərbaycanın milli maraqları və regional əməkdaşlıq istiqamətindəki prioritetlərini ətraflı şəkildə şərh edib, ölkənin sülh, sabitlik və inkişaf strategiyasını vurğulayıb.
44 günlük Vətən müharibəsi torpaqlarımızın işğaldan azad edilməsini təmin edib, eyni zamanda Azərbaycan dövlətinin beynəlxalq hüquq və ədalət prinsiplərinə sadiqliyini bir daha təsdiqləyib. Postmüharibə dövründə vasitəçilər hansı addımı atmalı olduqlarını dəqiq bilmirdilər və məhz ölkəmiz təşəbbüskar rolunu üzərinə götürərək Ermənistanla sülh prosesini irəli sürüb. Avqustun 8-də Vaşinqtonda paraflanan sənəd Azərbaycanın dövlətlərarası münasibətlərə dair mövqeyini əks etdirir və regionda uzunmüddətli sülhün təminatıdır. Vaşinqtonda sənədlərin paraflanması Qarabağ məsələsinin faktiki olaraq sona çatdığını göstərir. Eyni zamanda, sənəd beynəlxalq ictimaiyyət tərəfindən müsbət qarşılanıb və onun pozulması yalnız Ermənistan üçün deyil, bütün region üçün mənfi nəticələr doğura bilər. Sözügedən müsahibədə Prezident İlham Əliyev qeyd etdiyi kimi, Vaşinqtonda imzalanan sənədin əhəmiyyəti ondan ibarətdir ki, hər iki tərəf bir-birinin ərazi bütövlüyünü tanıyır və gələcək təmaslarını beynəlxalq hüququn bu fundamental tezisi əsasında planlaşdıracaq: “Əgər onlar bizim ərazi bütövlüyümüzü tanımaqdan imtina etsələr, biz də onların ərazi bütövlüyünü tanımaqdan imtina edəcəyik. Burada kim qazanacaq, kim uduzacaq? Məncə, bu, ritorik sualdır. Ona görə hesab edirəm ki, Ermənistanın istənilən gələcək hökumətində kifayət qədər müdriklik, ağlabatan yanaşma olacaq ki, Vaşinqtonda razılaşdığımızı şübhə altına almasın”.
Müsahibədə Azərbaycan dövlətinin şaxələndirilmiş xarici siyasət strategiyası önəmli məqamlardan biri kimi vurğulanıb. Bu siyasət həm regional, həm də qlobal səviyyədə ölkəmizin təsir imkanlarını artırır. Dövlətimiz hətta mürəkkəb beynəlxalq məsələlərdə təşəbbüskar mövqeyini nümayiş etdirir, tərəfdaşlarla effektiv danışıqlar aparır və strateji maraqları qoruyur. Həmin yanaşma Azərbaycanın təhlükəsizlik sahəsində güclü mövqeyinin təmin olunmasına, iqtisadi inkişafın davamlı şəkildə sürətlənməsinə və diplomatik platformalarda nüfuzunun möhkəmlənməsinə xidmət edir. Bununla yanaşı, şaxələndirilmiş xarici siyasət yeni əməkdaşlıq formatlarının yaradılmasını dəstəkləyir və Azərbaycanın qlobal müstəvidə rolunu daha da önəmli edir. Bütün bunlar həm də digər dövlətlərlə konstruktiv dialoqu inkişaf etdirməyə, beynəlxalq hüququn prinsiplərinin qorunmasına töhfə verir. Dövlətimizin başçısı müsahibəsində bildirib ki, bizim şaxələndirilmiş xarici siyasət istiqamətlərimiz də Azərbaycana hadisələrin mərkəzində olmağa imkan verir: “Çünki bu gün az sayda ölkə hazırda çətin vəziyyətdə olanlarla çox səmimi şəkildə danışa bilər. Biz bunu etməyə hazırıq. Ümidvarıq ki, bu işləyəcək. Lakin əlbəttə ki, biz heç kəsə özümüzü məcburi təqdim etmirik. Sadəcə, bizdən xahiş ediləndə zəruri olanı edirik”.
Azərbaycan Prezidenti müsahibəsində Türk Dövlətləri Təşkilatının strateji əhəmiyyətini də diqqətə çatdırıb. Təşkilat böyük potensiala malikdir və üzv dövlətlərin ortaq tarixi, mədəni və etnik kökləri onu unikal edir. Azərbaycan bu qurumu gücləndirməyə davam edir və digər üzv dövlətlərlə müttəfiqlik, həmçinin strateji tərəfdaşlıq müqavilələri imzalanıb. Xüsusilə 2021-ci il iyunun 15-də ölkəmizin mədəniyyət paytaxtı olan Şuşada imzalanmış “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi”, həmçinin Özbəkistan və digər üzvlərlə əməkdaşlıq dövlətimizin mövqeyini daha da möhkəmləndirir. Türk Dövlətləri Təşkilatına üzv ölkələrin əhalisinin artımı və iqtisadi potensialın yüksəlməsi Cənubi Qafqazda böyük üstünlük deməkdir. Azərbaycan təbii sərvətlərə malikdir və güclü iqtisadi göstəricilərinə görə regionda öz mövqeyini qorumaq və gücləndirmək imkanına sahibdir.
Beləliklə, Prezident İlham Əliyevin bu müsahibəsi dövlətimizin yeni prioritetlərini və regional liderliyini bir daha nümayiş etdirir. Azərbaycan sülh və sabitliyə, beynəlxalq hüquqa hörmət və qlobal əməkdaşlığa böyük önəm verir. 44 günlük Vətən müharibəsi ilə bərpa olunan ədalət, sülh prosesindəki təşəbbüskarlıq, şaxələndirilmiş xarici siyasət və Türk Dövlətləri Təşkilatı ilə strateji əlaqələr ölkəmizin dünya birliyində rolunu gücləndirir.
Heydər Əsədov
Milli Məclisin deputatı
Geri dön