26 Avqust – Laçın Şəhəri Günü
Bu gün, 10:47. Yazar: azer
Hər il 26 avqust tarixində Azərbaycan xalqı öz tarixi torpaqlarından biri olan Laçın şəhərinin azad olunmasını qeyd edir. Bu gün yalnız bir şəhərin deyil, bütövlükdə Azərbaycanın suverenliyinin və ərazi bütövlüyünün rəmzi kimi dəyərləndirilir. 1992-ci ilin may ayında Ermənistan silahlı qüvvələri tərəfindən işğal edilən Laçın rayonu, Azərbaycanın digər bölgələrindən fərqli olaraq strateji mövqeyi ilə xüsusi əhəmiyyət daşıyırdı. Laçın rayonu Ermənistanla Dağlıq Qarabağ arasında körpü rolunu oynayır və bu səbəbdən də işğal dövründə "Laçın dəhlizi" adlandırılan bu ərazi Ermənistan tərəfindən qeyri-qanuni məqsədlərlə istifadə olunurdu. İşğal dövründə Laçının şəhər infrastrukturu dağıdıldı, tarixi-mədəni abidələri talan edildi, yerli azərbaycanlı əhali isə öz doğma torpaqlarından didərgin salındı. 30 ilə yaxın müddətdə Laçın əsarət altında qaldı. Azərbaycan Ordusunun 2020-ci ilin payızında apardığı 44 günlük Vətən Müharibəsi nəticəsində ölkəmiz tarixi Qələbəyə nail oldu. Nəticədə, 2020-ci il 10 noyabr tarixində imzalanmış üçtərəfli bəyanata əsasən, Laçın rayonu 2020-ci ilin 1 dekabrında Azərbaycana qaytarıldı. Lakin Laçın şəhərinin özü və ətraf kəndlər 2022-ci ilin 26 avqustunda tam nəzarətə keçdi. Məhz bu səbəbdən 26 avqust “Laçın Şəhəri Günü” kimi qeyd olunur. Azərbaycan Respublikasının Prezidenti İlham Əliyev Laçının azad olunmasından sonra bu bölgəyə dəfələrlə səfərlər edib. Prezidentin səfərləri zamanı bölgədə aparılan bərpa və yenidənqurma işləri ilə yerində tanış olunub, bir çox strateji obyektlərin – yolların, məktəblərin, yaşayış binalarının və digər infrastruktur layihələrinin təməli qoyulub və açılışı həyata keçirilib.
2022-ci ildən etibarən cənab Prezidentin Laçına etdiyi hər bir səfər bu torpaqların dirçəlişini, Laçının əvvəlki şöhrətinə qovuşacağını bir daha sübut edir.
Laçının azad olunmasından dərhal sonra şəhərdə genişmiqyaslı bərpa və yenidənqurma işlərinə başlanılıb. Əsas diqqət yol infrastrukturu, elektrik, su, qaz xətləri, təhsil və səhiyyə obyektlərinin yenilənməsinə yönəldilib.
Əsas layihələrdən bəziləri bunlardır:
Laçın şəhərinə yeni giriş yolları və avtomobil magistralları;
Yeni məktəb və uşaq bağçalarının tikintisi;
Mədəniyyət mərkəzlərinin bərpası;
Yaşayış kompleksləri və fərdi evlərin inşası;
"Ağıllı kənd" və "ağıllı şəhər" konsepsiyası çərçivəsində layihələr.
Həmçinin, “Böyük Qayıdış” proqramı çərçivəsində minlərlə laçınlı ailənin doğma yurdlarına təhlükəsiz və mərhələli şəkildə qayıdışı həyata keçirilir. Azərbaycan dövləti tərəfindən həyata keçirilən məqsədyönlü siyasət nəticəsində artıq bir çox laçınlı ailə öz doğma torpaqlarına qayıdıb. Qayıdış prosesi davam edir və yaxın illərdə Laçının tam bərpası və sosial-iqtisadi həyatının canlanması gözlənilir. Qayıdan ailələr üçün hər cür şərait yaradılıb: müasir tipli evlər, məktəblər, poliklinikalar, sosial obyektlər istifadəyə verilib. Dövlətin diqqəti sayəsində Laçın bir daha viranə deyil, inkişaf edən, müasir Azərbaycan şəhərinə çevrilir. 26 Avqust – Laçın Şəhəri Günü təkcə bir coğrafi məkanın deyil, bütöv bir xalqın iradəsinin, əzminin və birliyinin simvoludur. Bu gün biz yalnız Laçının azadlığını deyil, eyni zamanda Qarabağın və Şərqi Zəngəzurun dirçəlişini qeyd edirik. Laçın qayıtdı – əbədi və dönməz olaraq!
Günay Allahverdiyeva
Yeni Azərbaycan Partiyası Laçın rayon təşkilatının fəal üzvü
Geri dön