Quterreş İsraili İordan çayının qərb sahilini bölmək üçün məskunlaşma planını dayandırmağa çağırdığını təkrarlayıb
Bu gün, 10:31. Yazar: sevinc1
BMT-nin baş katibi Antonio Quterreş növbəti dəfə İsrail hökumətini işğal altındakı İordan çayının qərb sahilini bölmək planını dayandırmağa çağırıb.
İsrailin işğal altındakı Şərqi Qüdsdə fələstinlilərdən ələ keçirilən məskunlaşmaları genişləndirəcək və şimalı İordan çayının cənubundan ayıracaq “E1 Layihəsi”nə son təsdiqini verdikdən sonra Quterreş ABŞ mərkəzli X şirkətinin sosial media platformasından açıqlama verib.
Ələ keçirilən Fələstin torpaqlarında hər hansı bir məskunlaşmanın beynəlxalq hüquqa zidd olduğunu xatırladan Quterreş, "İsrail səlahiyyətlilərinin İordan çayının qərb sahilini bölmək məqsədi daşıyan qeyri-qanuni məskunlaşmaları genişləndirmək qərarı geri alınmalıdır" dedi.
Quterreş Qəzzada geniş miqyaslı ölüm və dağıntıların qarşısının alınmasının həyati əhəmiyyətini vurğulayaraq, dərhal atəşkəsə çağırıb.
BMT Baş katibinin sözçüsü Stefan Dujarrik avqustun 15-də verdiyi açıqlamada Quterreşin İsrailə “E1” planını dayandırmaq çağırışını açıq şəkildə paylaşıb.
Quterreş açıqlamasında "Mövqeyimiz aydındır: Şərqi Qüds də daxil olmaqla, İordan çayının qərb sahilindəki İsrail yaşayış məntəqələri və onlarla əlaqəli rejim beynəlxalq hüquqa zidd olaraq qurulub və qorunub saxlanılıb" deyib.
Fələstində işğalı genişləndirmək üçün "E1 Layihəsi"
Tarixən Şərqi Qüdsün bir hissəsi olan, lakin Ayrılıq Divarının (Utanc Divarı) İordan çayının qərb sahilində yerləşən Fələstin məhəlləsi Azəriyə yaxınlığında salınan “Maale Adumim” qəsəbəsini Qərbi Qüdsə aparan yola birləşdirmək üçün “E1 Layihəsi” başladılıb.
Bu prosesin bir hissəsi olaraq, ərazidə 4000-dən çox qeyri-qanuni yaşayış evi və otel tikmək üçün 12 min dunam Fələstin torpağı ələ keçirilib.
“E1 Layihəsi” Şərqi Qüdsü İordan çayının qərb sahilindəki Fələstin ərazilərindən təcrid etmək və əlaqəni kəsmək məqsədi daşıyır.
aia.az
Tərcümə şöbəsi
Geri dön