Elm və Təhsilin Birliyi: Həmkarlar İttifaqı Yeni Adla, Yeni Mərhələdə
Bu gün, 09:30. Yazar: azer
"AİA.AZ" xəbər verir ki: Azərbaycan Təhsil İşçiləri Azad Həmkarlar İttifaqı bundan sonra fəaliyyətini Elm və Təhsil İşçiləri Həmkarlar İttifaqı (ETİHİ) adı ilə davam etdirəcək. Bu dəyişiklik təkcə adın yenilənməsi deyil, həm də mahiyyətcə daha geniş və strateji baxış bucağının formalaşması deməkdir.
Yeni ad ölkəmizdə elmin və təhsilin bir-birini tamamlayan sahələr kimi inkişaf etdirilməsi zərurətindən irəli gəlir. XXI əsrdə bilik iqtisadiyyatının qurulması və yüksək texnoloji cəmiyyətin formalaşdırılması üçün elm və təhsil arasında sıx əlaqələrin möhkəmləndirilməsi həyati əhəmiyyət daşıyır.
ETİHİ bu baxımdan, həm təhsil, həm də elmi tədqiqat müəssisələrində çalışan əməkdaşların hüquqlarının müdafiəsini, sosial rifahının təmin olunmasını və peşəkar mühitin gücləndirilməsini öz fəaliyyətinin mərkəzinə qoyur.
Bu yenilənmə çərçivəsində Həmkarlar İttifaqının təşkilati strukturunun təkmilləşdirilməsi, fəaliyyət dairəsinin genişləndirilməsi və müasir dövrün çağırışlarına cavab verən yeni təşəbbüslərin həyata keçirilməsi nəzərdə tutulur. Təşkilat artıq yalnız məktəblərdə və təhsil müəssisələrində deyil, ali təhsil ocaqlarında, elmi tədqiqat institutlarında çalışan əməkdaşların da ümumi maraqlarını ifadə edən bir platformaya çevrilir.
Yeni mərhələdə ETİHİ-nin əsas məqsədi əməkdaşların sosial müdafiəsinin gücləndirilməsi ilə yanaşı, onların elmi-pedaqoji fəaliyyətlərini stimullaşdırmaq, peşəkar inkişafına dəstək vermək və innovativ ideyaların təşviqinə şərait yaratmaq olacaq.
Cəmiyyətin inkişafında elm və təhsilin birgə rolu getdikcə artdığı bir dövrdə, ETİHİ-nin yaranması, bu iki mühüm sahədə çalışan insanları bir araya gətirərək həmrəylik ruhunu gücləndirəcək, qarşıya qoyulan milli hədəflərə çatmaqda əhəmiyyətli töhfə verəcəkdir.
AİA.AZ
Bayram Xudayarov
Geri dön