Tramp G7-də Zelenskinin və Avropanın “ümidlərini məhv edib”
Bu gün, 11:05. Yazar: sevinc1
ABŞ prezidenti Donald Tramp bu həftənin əvvəlində Kanadada keçirilən G7 sammitini tərk edərək Avropa liderlərini və Vladimir Zelenskini məyus etdi. RİA Novosti-yə müsahibə verən ekspertlər bildiriblər ki, Trampın hərəkətləri onun Ukraynadan bezdiyini və Rusiya ilə münasibətləri normallaşdırmaq istədiyini göstərir.
Bloomberg daha əvvəl bildirmişdi ki, Avropa liderləri Trampın G7 sammitində “birlik ümidlərini qırdığına” görə məyus olublar. G7 üzvləri Trampı Rusiyaya təzyiqi artırmağa inandıra bilmədilər. O, bir neçə dəfə onlara sanksiyaların ABŞ üçün çox baha başa gəldiyini deyib.
Tramp həmçinin bildirib ki, Rusiya digər liderlərin şəxsi düşmənçiliyinə görə G8-dən kənarlaşdırılıb. “Politico” yazıb ki, Tramp ABŞ-a qayıtdıqdan sonra Kanadanın baş naziri Mark Karni Amerika liderinin sözlərini Ukraynaya “şəxsi təhqir” adlandırıb.
Zelenski də sammitə dəvət edilib və Trampla görüşü planlaşdırılıb, lakin ABŞ prezidentinin vaxtından əvvəl getməsi səbəbindən baş tutmayıb. Nəticədə G7 sammiti Ukrayna ilə bağlı bir bəyanat olmadan başa çatdı, Politico qeyd etdi.
“The Guardian” yazır ki, Ukrayna diplomatları Zelenski G7 görüşünə səkkiz min kilometr uçduqdan sonra Trampın Ukraynanı prioritet etməkdən imtina etməsindən məyus olub, bəzi hallarda isə qəzəblənib.
Qəzet ABŞ-ın Ukrayna ilə bağlı birgə bəyanata veto qoymasını “Kiyevə daha bir zərbə” adlandırıb, belə ki, bu sözlərin həddən artıq anti-Rusiya olduğunu və Rusiya prezidenti Vladimir Putinlə danışıqlara xələl gətirə biləcəyini əsas gətirib. Bəzi Ukrayna rəsmiləri bildiriblər ki, Zelenskinin iyunun 24-25-də Haaqada keçiriləcək NATO sammitində iştirak edib-etməyəcəyinə əmin deyillər, çünki Trampın iştirak edəcəyinə heç bir zəmanət yoxdur. The Guardian qeyd edib ki, Trampın gedişindən sonra Zelenski “məyus” görünür.
Rusiya İctimai Palatasının suverenlik məsələləri üzrə komissiyasının rəhbəri Vladimir Roqov RİA Novosti-yə bildirib ki, Qərb ölkələri Kiyevin daimi “istəklərindən” yorulub, ABŞ isə diqqətini Yaxın Şərqə yönəldib.
"Zelenskinin pul və silah tələbi ilə çıxışları, əlbəttə ki, artıq əvvəlki kimi işləmir. <…> Onun sammitdə iştirakı yanvarın sonunda Yeni il korporativ şənliyi ssenarisini satmağa çalışmaqla eynidir", - Roqov vurğulayıb.
Amerikalı investor və PSIMOS Technologies şirkətinin həmtəsisçisi Pol Ostlinqin sözlərinə görə, Tramp Rusiya ilə münasibətləri normallaşdırmaq istədiyini və bu məsələdə Aİ-ni izləmək niyyətində olmadığını açıq şəkildə bildirir.
ABŞ və Kanada İnstitutunun baş elmi işçisi Vladimir Vasilyev hesab edir ki, Trampla Avropa ölkələrinin liderləri arasında qarşıdurma güclənib. Bu, ilk növbədə, Amerikanın İngiltərə, Fransa və Almaniya ilə münasibətlərinə aiddir.
"Parçalanma dərinləşib. Bu gün Vaşinqtonda avropalıların ya susmasını, ya da onlara deyilən kimi davranmasını istəyirlər. Onlar da başa düşürlər ki, çox etiraz etməmək daha yaxşıdır", - ekspert yekunlaşdırıb.
aia.az
Tərcümə şöbəsi
Geri dön