Ana Sayfa > Siyasət > Pezeşkian İranla Azərbaycan arasında normal münasibətlərin qurulmasında maraqlıdır
Pezeşkian İranla Azərbaycan arasında normal münasibətlərin qurulmasında maraqlıdırBu gün, 11:28. Yazar: sevinc1 |
![]() "İran prezidenti Pezeşkianın Azərbaycana səfəri, sələflərindən fərqli olaraq kifayət qədər səmimi əhval-ruhiyyədə keçdi. Bu da təbii olaraq, İran prezidentinin milli kimliyi, son zamanlar şair Şəhriyarın şeirlərini doğma dildə səsləndirməsi, Azərbaycan xalqında rəğbət oyatması ilə bağlıdır. Hiss olunur ki, Pezeşkian İranla Azərbaycan arasında normal münasibətlərin qurulmasında maraqlıdır. Bu baxımdan səfəri əlamətdar hadisə kimi qiymətləndirmək olar". Bu fikirləri mətbata Milli Məclisin deputatı Nəsib Məhəməliyev İran prezidentinin Azərbaycana səfərini şərh edərkən səsləndirib. Millət vəkilinin sözlərinə görə, bütün bunlarla yanaşı, nəzərə almaq lazımdır ki, İran dövlət idarəetmə sistemində əsas söz sahibi ali dini rəhbər Seyid Əli Xamaneyi və bilavasitə onun tabeliyində olan “SEPAH”-dır: "Prezidentin onlara təsir imkanları məhduddur. Düşünürəm ki, Pezeşkianın müstəqil siyasət aparmaq imkanları olsaydı, münasibətlərdə daha da irəli getmək mümkün olardı. Əfsuslar olsun ki, indiki şərtlərlə bu qeyri-mümkün görünür. Pezeşkianın səfər öncəsi Azərbaycan televiziyasına verdiyi müsahibədə də hiss olunurdu ki, prezident mövcud sistemlə barışmaq məcburiyyətindədir". Nəsib Məhəməliyev qeyd edib ki, Qarabağın işğaldan azad olunması ilə, regionda vəziyyət kökündən dəyişdi: "Azərbaycanın formalaşdırdığı yeni reallıqlarla hamı, o cümlədən İran hesablaşmalı oldu. Baxmayaraq ki, İran rejimi müharibədən sonra da, Ermənistanın yanında oldu, Zəngəzur dəhlizinin açılmasının əleyhinə çıxış etdi. Səfirliyimizə qarşı terror aktı həyata keçirildi". Deputat onu da deyib ki, Azərbaycan beynəlxalq müstəvidə etibarlı tərəfdaş kimi tanınır: "Azərbaycanla iqtisadi, siyasi, mədəni və digər sahələrdə əməkdaşlıq, uzun illər beynəlxalq sanksiyalardan əziyyət çəkən İran üçün, son dərəcə əhəmiyyətlidir. Düşünürəm ki, iki dövlət başçısı tərəfindən imzalanmış bəyannamə, ayrı-ayrı nazirliklər arasında əldə olunmuş razılaşmalar, münasibətlərimizin inkişafına təkan verəcəkdir". Süleyman Geri dön |