İğdır-Naxçıvan qaz kəməri enerji təhlükəsizliyi və strateji tərəfdaşlığın yeni mərhələsidir
Bu gün, 12:00. Yazar: sevinc1
İğdır-Naxçıvan qaz kəmərinin istismara verilməsi təkcə enerji layihəsi deyil, həm də regionun iqtisadi və geosiyasi xəritəsini dəyişdirən mühüm hadisədir.
Martın 5-də Ankarada keçirilən videobağlantı formatlı açılış mərasimi Azərbaycan və Türkiyə arasındakı strateji əməkdaşlığın növbəti mühüm mərhələsi kimi qiymətləndirilə bilər.
Azərbaycan Prezidenti İlham Əliyev açılış mərasimində qeyd etdi ki, Naxçıvan artıq bir əsrdən çoxdur ki, Azərbaycanın əsas hissəsindən ayrı düşüb. Ermənistanın tətbiq etdiyi blokada Naxçıvanın enerji təminatına ciddi təsir göstərib. Bu gün isə Türkiyə üzərindən Azərbaycandan gələn qazın Naxçıvana nəqli ilə bu problem tamamilə həll olunur.
Bu qaz kəməri Naxçıvanın enerji təhlükəsizliyini təmin edəcək və blokadadan çıxışı üçün yeni iqtisadi imkanlar yaradacaq. Bu, həm də Ermənistanın uzun illərdir həyata keçirdiyi blokada siyasətinin iflasa uğramasının göstəricisidir.
Son illər Azərbaycan və Türkiyə enerji sahəsində mühüm layihələr həyata keçirərək Avropanın enerji xəritəsini dəyişdirib. Bakı-Tbilisi-Ceyhan, Bakı-Tbilisi-Ərzurum, TANAP kimi layihələr Azərbaycanın enerji ixrac marşrutlarını diversifikasiya etməsinə imkan verib. İğdır-Naxçıvan qaz kəməri isə bu uğurların davamıdır və iki ölkə arasındakı enerji əməkdaşlığının daha da dərinləşdiyini göstərir.
Türkiyə Prezidenti Rəcəb Tayyib Ərdoğan açılış mərasimində vurğuladı ki, bu qaz kəməri təkcə enerji layihəsi deyil, həm də Azərbaycan-Türkiyə qardaşlığının simvoludur. Bu layihə regionda sabitlik və iqtisadi inkişaf üçün yeni imkanlar açacaq.
Kəmərin regional və qlobal geosiyasi təsirlərini nəzərdən keçirərkən aydın görünür ki, İğdır-Naxçıvan qaz kəməri təkcə Azərbaycan və Türkiyə üçün deyil, eyni zamanda regionun geosiyasi reallıqları üçün də vacib əhəmiyyət kəsb edir.
Əsas üstünlüyü odur ki, Ermənistanın mövqeyi zəifləyir. Bu layihə, Ermənistanın Naxçıvan üzərindəki təzyiq imkanlarını sıfıra endirir. Bundan sonra Naxçıvanın enerji təminatı Ermənistanın xoşməramlı davranışından asılı olmayacaq.
Eyni zamanda bu kəmər vasitəsilə türk dünyasının inteqrasiyası güclənir. Azərbaycan və Türkiyə arasında yeni enerji xətləri həm iqtisadi, həm də siyasi inteqrasiyanı gücləndirir. Bu layihə həm də Türk dünyasının iqtisadi bağlarını möhkəmləndirən mühüm addımdır.
Kəmər Avropanın enerji təhlükəsizliyinə də töhfə verəcək. Azərbaycan artıq illərdir Avropaya qaz ixrac edən əsas ölkələrdən biridir. Bu yeni layihə isə Azərbaycanın enerji infrastrukturunu daha da gücləndirir və Avropaya qaz ixracının sabitliyini təmin edir.
Bir sözlə, İğdır-Naxçıvan qaz kəməri Azərbaycan və Türkiyə arasında strateji tərəfdaşlığın yeni simvoludur. Bu layihə Naxçıvanın enerji təhlükəsizliyini təmin etməklə yanaşı, regionun geosiyasi mənzərəsini də dəyişdirir. Azərbaycan və Türkiyə birgə həyata keçirdikləri enerji və nəqliyyat layihələri ilə nəinki öz milli maraqlarını qoruyur, eyni zamanda regional və qlobal səviyyədə strateji aktor kimi çıxış edirlər. İğdır-Naxçıvan qaz kəməri enerji təhlükəsizliyi və strateji tərəfdaşlığın yeni mərhələsidir
Məşhur Məmmədov,
Millət vəkili
Geri dön