Mobil versiya
İstehsalatda hadisə olarsa, hansı halda kompensasiya ödəniləcək?
Tarix: 02-07-2016 | Saat: 13:21
Bölmə:Aia TV | çapa göndər

İstehsalatda hadisə olarsa, hansı halda kompensasiya ödəniləcək?





Əmək və Əhalinin Sosial Müdafiəsi Nazirliyi istehsalatda baş verən bədbəxt hadisələr zamanı işçilərə hansı halda kompensasiyanın ödənildiyini açıqlayıb.

Aia.Az bildirir ki, Əmək və Əhalinin Sosial Müdafiəsi Nazirliyi Dövlət Əmək Müfəttişliyi Xidmətinin (DƏMX) Əməyin mühafizəsi məsələlərinə nəzarət və istehsalatda baş vermiş bədbəxt hadisələrin tədqiqi sektorunun müdiri İlqar Məmmədov Trend-ə deyib ki, "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında" qanuna uyğun olaraq, sığortalanmış işçilərə dəymiş zərərin əvəzi sığorta şirkətləri tərəfindən ödənilir: "Hamısında olmasa da, əksər müəssisələrdə buna əməl edilir və dəymiş zərərin əvəzi sığorta şirkətləri tərəfindən ödənilir. Əməl olunmadığı və müəssisə təqsirli hesab olunduğu halda isə müəssisə tərəfindən həmin dəymiş zərər, yəni kompensasiya Nazirlər Kabinetinin müvafiq qərarı ilə ödənilir".

Xidmət rəsmisi əlavə edib ki, bədbəxt hadisə nəticəsində xəsarət almış işçilərə dəymiş zərərin əvəzi onun əmək qabiliyyətini itirilməsi faizinə görə ödənilir: "Əgər işçinin maaşı 300 manatdırsa, əmək qabiliyyətinin 60-70 faizini itiribsə, o, həmin 300 manatın 70 faizi miqdarında hər ay məvacib alacaq. Ölüm hadisəsində isə ödəniş 100 faiz edilir. Sığorta şirkəti tərəfindən də müəyyən düstur mövcuddur. Bu düstura görə, işçinin ailə tərkibi də, məvacibi də hesablanır. Buna görə də ödənişin məbləği fərqli olur. Bu, işəgötürənlə sığorta şirkəti arasında bağlanmış müqavilə əsasında aparılır".

İ.Məmmədovun sözlərinə görə, işçi əmək qabiliyyətini itirdiyi və əlilllik dərəcəsi aldığı təqdirdə ödəniş edilir: "İşçi 1 neçə aya sağalacaqsa, öz iş yerində işini davam etdirəcəksə, heç bir kompensasiyadan söhbət gedə bilməz. İşçi əmək qabiliyyətini itirmirsə, ona heç bir kompensasiya ödənilmir. Yalnız xəstəxanada olduğu müddətdə əmək qabiliyyətinin müvəqqəti itirilməsinə görə müəssisə tərəfindən ona məvacib ödənilir".

"Baku Steel Company" zavodundakı partlayış zamanı xəsarət alaraq xəstəxanaya yerləşdirilən 3 nəfərə kompensasiyanın verilib-verilməyəcəyinə gəldikdə, İ.Məmmədov deyib ki, bunu hələ müəyyən etmək olmaz: "Bunu yalnız həkimlər müəyyən edə bilər. Onlar həkim nəzarəti altında olacaqlar. Əgər əmək qabiliyyətini itirəcəklərsə, itirdikləri əmək qabiliyyətinə görə dəymiş zərərin əvəzi onlara ödəniləcək. Amma qayıdıb işləyəcəklərsə, onlara heç bir ödəniş olmayacaq. "Baku Steel Company" zavodunun işçilərinin əksəriyyəti sığortalanıb. Sadəcə olaraq, "Baku Steel Company"də yalnız onun özü deyil, digər müəssisələr, yəni subpodratçı təşkilatlar fəaliyyət göstərir. Ola bilər ki, onların birində sığorta olmasın. Bunu da araşdırma zamanı üzə çıxarıb müəyyən etmək olar".


aia.az



Məlumatlanmaq üçün Facebook səhifəmizi


Xəbəri paylaş


Digər xəbərlər



Xəbərə şərh yaz
Ad və soyad:*
E-Mail:
Şərhiniz:
Kodu yazın: *
yenilə, əgər kod görünmürsə
28-03-2024